Jastardyń usynǵan jobalary san alýan. Qaısybiri qyzmet kórsetýdi damytqysy kelse, endi bir toby saýda-sattyq, mal sharýashylyǵy, jeńil ónerkásip baǵytyn tańdaǵan. 9 jas mal sharýashylyǵyna den qoıypty. 13 jastyń jobasy – qyzmet kórsetý baǵytynda. Saýda salasynda baǵyn synaǵysy keletinder jeteý eken. Jeńil ónerkásip pen ósimdik sharýashylyǵynda kásip qylýǵa nıet qylǵan eki jas bar.
Móldir sulýlyq ındýstrııasyna kezdeısoq kelmegen. Buǵan deıingi alty jylda osy salanyń qyr-syryn meńgergen.
– Kópten beri óz bıznesimdi ashý oıymda júrdi. Jeńildetilgen nesıe baǵdarlamasy týraly jańalyqtardan estip qalyp, qatysýǵa bel býdym. Sharttaryn bilip, tyńǵylyqty daıyndaldym. Sonyń nátıjesinde komıssııa aldynda jobamdy qorǵap shyqtym, – deıdi Móldir Taılaqova.
Baǵdarlamanyń bastamashysy Eńbek jáne halyqty áleýmettik qorǵaý mınıstrligi ekeni málim. Nesıeleý «Agrarlyq nesıe korporasııasy» AQ arqyly júzege asady. Baǵdardama aıasynda 21 jastan 35 jasqa deıingi kásipkerler jeńildetilgen nesıege qol jetkize alady. Baǵdarlamaǵa qatysýshylardyń jasy «Agrarlyq kredıttik korporasııaǵa» ótinish bergen kezi eskeriledi.
Bul nesıe jastarǵa óz isin ashý, odan ári damytý maqsatynda kómek berýdi kózdeıdi. Shartqa sáıkes jastaǵy el azamaty kez kelgen salada bıznes asha alady. Bıznestiń túrine shekteý joq.
Nesıe – mólsheri 5 mln teńgege deıin. Merzimi – kez kelgen maqsattaǵy jobalar úshin – 5 jyl, al mal sharýashylyǵy úshin – 7 jylǵa deıin. Negizgi qaryz ben syıaqyny óteýge jeńildik kezeń de qarastyrylǵan. Ol nesıe merziminiń úshten birin quraıdy.
Mundaǵy basty shart – kásipkerlikte bes jyldan kem emes ótil jáne kepildiń bolýy. Kepilge kásipker jyljymaly, ıa jyljymaıtyn múlikti qoıa alady. Kepil tabylmasa, kepil berýshi retinde ata-anasyn, týystaryn tartýyna múmkindigi bar. Mıkrokredıtter arnaıy komıssııanyń sheshimi negizinde beriledi. Komıssııa aldynda úmitkerler ózderiniń bıznes-jobalaryn tanystyryp, qorǵaýǵa tıis.
QARAǴANDY
