Kollajdy jasaǵan Záýresh SMAǴUL, «EQ»
Jerlesteriniń ortasynan alystamaǵan kompozıtor Sársenbek Bákirdiń qaı áni bolsyn, tyńdarmannyń jan álemimen astasyp jatatyndaı kórinedi. Onyń janaryndaǵy beımálim tynyshtyqty saqtaǵan rııasyz romantıka áseri jyldar boıy tarqamaıtyn ánge aınalyp jatady.
Ánge mátin suramaı, óleńge án jazatyn kompozıtorlar qazirgi kezde «Qyzyl kitapqa» enip ketken sekildi kórinetini bar. Sársenbektiń ánderin tyńdaǵanda onyń, shyn máninde, poezııadan alystamaǵanyn túsinesiń. О́ıtkeni ánderinde mán men mazmun qatar júredi.
Aıtýly aqyn Serik Tomanovtyń «Soǵady sen dep júregim» óleńi kompozıtordy beıjaı qaldyrmaǵany anyq. О́ıtkeni júrek qylyn shertetin shyǵarmany kompozıtor ǵajap áýendi ánge aınaldyrdy. Áýelde «Aýzynan aıdyń túsken qyz» ánimen tyńdarmannyń júreginen oıyp turyp oryn alǵan kompozıtor shyǵarmalary ýaqytynda naǵyz hıtke aınalǵany aıdaı aqıqat. Sol bir móldir shaqty eshkim umytqan joq.
Aqıqatynda Sársenbektiń qaı ánin tyńdasańyz da tynyp aǵyp jatqan ózen kóz aldyńyzǵa keledi. Ánderi bir tynyshtyqty qalap turǵandaı kórinedi. Alqyn-julqyn, dańǵazaǵa toly arzanqol dúnıeniń mıkroskoppen izdep tabý qıyn shyǵar. Al «Soǵady sen dep júregim» shyǵarmasyn tyńdaǵan kezde damylsyz soǵyp turǵan saǵynysh saǵatynyń syrtylyn estigendeı kúı keshesiń. Án bir sátte syrlasyńa aınalyp ketetindeı-aq. Bolmysynan ániniń alystamaǵanyn túsinesiń. Áıtpese, ýaqyttyń búgingi aǵymynan alshaqtamaı, toıǵa arnalǵan talǵamsyz ánderdiń sońyna túsip keter me edi. Alaıda ol ondaı qadamǵa barǵan joq. Talǵampaz kompozıtordyń tańdaýy basqa. Qýanyshtysy sol – óz áleminen alystamaǵany.
«Soǵady sen dep júregim» áni, naǵyz retroǵa aınalatyn týyndy ekeni sózsiz. О́ıtkeni kompozıtor bir maýsymdyq án jazǵan emes, jazbaıtyn da shyǵar. Jyldar jylystasa da, Sársenbek Bákirdiń osy bir áni jurttyń júreginen óshken joq. Qaıta ýaqyt ótken saıyn saǵynysh sazyna aınalǵan dúnıe óz qunyn arttyra túsken sekildi.
«Alaýlap meniń nur óńim,
О́zińdi oılap júremin.
Kóńildiń tappaı bir emin,
Soǵady sen dep júregim.
Qypsha bel, qulyn músindim,
Kóńildiń qusyn ushyrdym.
О́mirdiń myna ózińsiz,
Mánsizin endi túsindim», dep keletin án qaıyrmasy kisi balasynyń júregine jyly tıetini sózsiz.
Serik Tomanovtyń óleńine jazylǵan tamasha ándi tyńdaǵanda boıyńdy ádemi bir sezim bılep alatyny ras. О́leńde saǵymǵa aınalǵan jyldardaǵy saǵynysh taby saırap jatyr. Al kompozıtor ánge aınaldyrǵannan keıin shyǵarmany ónersúıer qaýym lezde jattap alǵany da aqıqat. О́ıtkeni saz ben sóz tilge jeńil, júrekke jyly tıedi. Kóńil túkpirindegi sezim pernelerin dóp basqan týyndynyń áýeni men mátini egizdiń syńaryndaı jarasa ketkeni sózsiz.
«Kórgenshe seni asyqtym,
Kúıin bir keship ǵashyqtyń.
О́zińnen uzap qalsam-aq,
Sezimniń selin tasyttyń», dep bastalatyn qaıyrma aldyndaǵy shýmaqta jigittik shaqtyń ańsar-armany aına-qatesiz berilip tur. Ánniń sózine zer salyp qaraǵan adam aqynnyń boıyndaǵy alapat sezimniń óleń tilinde ózgeshe órnek alǵanyn birden baıqaıtyny ras.
Lırıkalyq án tyńdaýshyny tebirentpeı qoımaıtyny daýsyz. Qalaı alyp qarasaq ta áýelde «Nur-Muqasan» dýetiniń, keıinnen «Mýzart» tobynyń oryndaýynda jurttyń júreginen oryn alǵan «Soǵady sen dep júregim» ániniń ólmeıtini ras. Búginginiń talantty ánshileri jańasha kózqaraspen kóńilden shyǵatyndaı kaver nusqasyn jasasa da artyqtyq etpeıdi.
