Qazirgi kúni aımaqtyń densaýlyq saqtaý salasyndaǵy bilikti medısına qyzmetkerleriniń sany 2 myńnyń ústinde. Byltyr el boıynsha medısınalyq joǵary oqý oryndaryn támamdaǵan úsh myńǵa jýyq túlektiń nebári 112-si ǵana bizdiń óńirge jiberilgen. Emdeý mekemelerine qosymsha 150-ge jýyq maman qajet eken. «Dıplommen – aýylǵa!» baǵdarlamasy aıasynda aýyldaǵy medısınalyq mekemelerge jumysqa ornalasyp jatqan jastarǵa materıaldyq kómek jetkilikti deńgeıde kórsetilip otyr. Byltyr aýyldarǵa barǵan jas mamandarǵa 318 myń teńge kóleminde kóterme járdemaqy jáne baspana satyp alýǵa 4,7 mln teńgege deıin arzan nesıe berildi. Alaıda bul jeńildikti paıdalanyp otyrǵandar tipti az. Aýyldarǵa byltyr oqý oryndaryn bitirgen nebári 17 jas dáriger ǵana barypty.
Dárigerlerdiń jetispeýshiligi Jelezın, Ýspen, Sharbaqty aýdandarynda erekshe baıqalady. Máselen, Jelezın aýdany ortalyǵyndaǵy aýrýhanada endokrınolog joq. Bul máseleni aıtyp habarlasqan jergilikti turǵyn (aty-jónin ataǵysy kelmedi) óziniń ekinshi toptaǵy múgedek ekenin, dárigerge barý úshin sonaý 200 shaqyrym jerdegi Pavlodar qalasyna jol júrýge májbúr bolatynyn jetkizdi. Onyń ústine úıindegi 74 jastaǵy sheshesin qaraýsyz qaldyryp ketetin kórinedi. Aýdan basshylyǵy da, óńirlik densaýlyq saqtaý basqarmasy da bul túıtkildi sheshýge qaýqarsyz.
Oblystyq densaýlyq saqtaý basqarmasynyń basshysy Aıdar Seıitqazınovtiń sózine súıensek, jalpy Jelezın aýdanynda 4 arnaıy dáriger jáne bir jalpy tájirıbe dárigeri jetispeıdi. Bul tyǵyryqtan shyǵý úshin óńirdegi shtattan tys dáriger mamandardyń kóshpeli qabyldaýlaryn turaqty uıymdastyryp kele jatqandaryn, jýyrda aq jeleńdiler brıgadasy Jelezınde bolyp, 68 turǵyndy qabyldaǵanyn málimdedi.
– Bizde jyljymaly medısınalyq pýnktter bar. Onyń biri osy shalǵaı aýdannyń halqyna qyzmet kórsetedi. Bıylǵy jyly aımaqtaǵy emdeý uıymdaryna 58 arnaıy dáriger jańadan keledi dep kútilýde. О́kinishke qaraı, olardyń arasynda endokrınologtar joq. Oblys bıýdjetinen medısına qyzmetkerlerin daıarlaýǵa 50 grant bólinýi kerek bolǵan. Bas dárigerler medısınalyq joǵary oqý oryndaryn aralap, jas mamandardy shaqyrý sharalaryn únemi uıymdastyrady, deıdi ol.
Ertis-Baıan aýmaǵynda arnaıy dárigerlerdiń jetispeýshiligi kóp jyldan beri jalǵasyp kele jatyr. Ásirese, pandemııa ýaqytynda olardyń tapshy ekeni aıqyn bilindi. Emdeý uıymdary áldeqashan qurmet demalysyna shyǵyp ketken ardagerlerin jumysqa shaqyrýǵa májbúr boldy. Bul jaǵdaı óńirdegi medısına kadrlarynyń jetispeýshiligin sheshýge buǵan deıingi basshylar bas qatyrmaǵanyn baıqatsa kerek. Pandemııadan beri úsh jylǵa jýyq ýaqyt ótse de, «baıaǵy jartas – sol jartas» bolyp, túıtkil saqtalyp qalyp otyr.
Atap óterligi, keıbir ákimdikter dárigerlerdi tartý úshin aýdan ortalyǵynda turǵyn úıler salýǵa bet bura bastaǵan. Mundaı jobalar Sharbaqty men Ýspen aýdandarynda bastalyp ta ketti. Aımaqtyń bul saladaǵy kadr tapshylyǵyn sheshýge degen keshendi jospary ázirlenbeı, aýyldaǵy medısınanyń deńgeıin kóterý oıǵa syımaıtyndaı.
Pavlodar oblysy
