Petropavldaǵy «Estý qabileti buzylǵan balalarǵa arnalǵan oblystyq arnaıy (túzetý) mektep-ınternaty» KMM bazasynda qurylǵan Sensitive estý qabileti buzylǵan artısterdiń bı teatry Dýbaıdaǵy horeografııalyq óner festıvalinde gran-prı jeńip aldy.
Halyqaralyq konkýrstarda debıýt jasaǵan oblystyq túzetý mektep-ınternatynyń tárbıelenýshileri birneshe nomınasııa boıynsha jeńiske jettti. Otandastarymyz «solo» (Danıal Kangojın) jáne «dýet» (Evgenıı Kýzmın jáne Ekaterına Voropaeva) sanattarynda úzdik atandy. Mektep-ınternat tárbıelenýshileriniń aǵa quramy da erekshelenip, «Vena valsi» jáne «Samba» horeografııalyq qoıylymdarymen birinshi oryn ıelendi. Sondaı-aq Sensitive teatry qazylar alqasynyń arnaıy syılyǵyna da ıe boldy.
Mádenıet jáne sport mınıstri Ashat Oralov jeńimpazdardy arnaıy quttyqtady.
«Men teatrdyń shyǵarmashylyq ujymyn jáne Soltústik Qazaqstan oblystyq arnaıy mektep-ınternatynyń túlekterin tolaıym tabystarymen quttyqtaımyn. Bul otandyq ınklıýzıvti teatr men Qazaqstannyń teatr óneri úshin úlken jetistik. Sonymen qatar bul bizdiń erekshe qajettilikteri bar otandastarymyzdy shabyttandyratyn tamasha nátıje, bul qandaı jaǵdaı bolsyn sizdiń shyǵarmashylyq áleýetińizdi júzege asyrýǵa bolatyndyǵynyń aıqyn dáleli. Teatrǵa bolashaq baıqaýlarda shyǵarmashylyq tabys pen jarqyn jeńister tileımin!», delingen quttyqtaýda.
