Shyńǵys Aıtmatov oqýlarynyń agrotehnıkalyq kolledjde uıymdastyrylýy beker emes. Alataýdyń arǵy betinen kelgen qalamger Jambyl qalasyndaǵy aýyl sharýashylyǵy baǵytyndaǵy tehnıkýmda bilim nárimen sýsyndaǵanyn jurt jaqsy biledi. Atalǵan tehnıkým arada ondaǵan jyl ótkende Qulan aýylyna kóshirilgen bolatyn.
Qalamger oqyǵan bilim ordasyndaǵy baıqaýda stýdentter eki kezeń boıynsha synǵa tústi. «Sóz – qudiret qashanda» dep atalǵan alǵashqy kezeń qatysýshylary kórkemsóz oqý arqyly ózara kim myqtyny anyqtasa, «Talanttar ómirde shyńdalady» kezeńinde topqa túsken oqý oryndarynyń talanttary Shyńǵys shyǵarmalarynan sahnalyq qoıylym kórsetti.
Stýdentter álemge áıgili qalamgerdiń «Ǵasyrdan da uzaq tún», «Jámılá», «Qosh bol, Gúlsary!», «Aq keme» syndy kórkem shyǵarmalarynan úzindi oqyǵany kókeıge qondy.
Baıqaý qorytyndysynda «Sóz – qudiret qashanda» kezeńi boıynsha Taraz servıs jáne tehnologııa kolledjiniń stýdenti Damır Balpyqov jeńimpaz atansa, «Parasat» kolledjiniń stýdenti Amangeldi Janserik birinshi orynǵa, Jambyl polıtehnıkalyq joǵary kolledjiniń stýdenti Ákimjan Qýanyshbekuly men Abaı atyndaǵy Shyǵys Qazaqstan gýmanıtarlyq kolledjiniń stýdenti Aısulý Qabysheva ekinshi orynǵa laıyq dep tanyldy. Júldeli úshinshi oryn Qaskeleń mádenıet kolledjinen kelgen Dinmuhamed Tólepbergen, Qulan agrotehnıkalyq kolledjiniń úmiti Ámına Jumamurat, Túrkistan kópsalaly agrarlyq kolledjiniń stýdenti Perızat Ábdirahmanovaǵa buıyrdy.
«Talanttar ómirde shyńdalady» kezeńinde «Shyńǵyshannyń aq bulty» qoıylymymen daralanǵan Túrkistan kópsalaly qolóner kolledjiniń stýdentteri top jarsa, Taldyqorǵan agrotehnıkalyq kolledjiniń stýdentteri júldeli birinshi oryndy ıelendi. Ekinshi oryn I.Ábdikárimov atyndaǵy Qyzylorda agrarlyq tehnıkalyq joǵary kolledji men Qaskeleń gýmanıtarlyq tehnıkalyq kolledji stýdentterine buıyrsa, Abaı atyndaǵy Jambyl gýmanıtarlyq kolledji jáne Baızaq, Abaı oblysynan kelgen Besqaraǵaı kolledjiniń stýdentteri úzdik úshtikti túıindedi.
Jambyl oblysy,
Turar Rysqulov aýdany
