Ult ónerine ólsheýsiz úles qosqan ónerpazdyń esimin eske alǵan Estaı aýylynyń jastary birqatar sharapatty is-sharany júzege asyrdy. Dálirek aıtsaq, S.Mútkenov atyndaǵy jalpy orta bilim beretin mektepte «Ardaqtaıyq Saryarqanyń asylyn» taqyrybynda Estaı aqynnyń ómirbaıany men shyǵarmashylyǵyna, ánderiniń tarıhyna arnalǵan ǵylymı jobalar saıysy ótti. Jobalar saıysynda 1-oryndy Gúlnar Sársen alsa, 2-oryndy Qyzǵaldaq Orazǵalı enshiledi, 3-oryn Erbolat Nurbaıǵa buıyrdy. Júldeli bolǵan oqýshylardy yntalandyrý maqsatynda Estaı aýylynyń jastary aqshalaı syı-sııapat tabystady.
Mektep dırektory Raıgúl Tursynbaıqyzy shákirtterdiń shabytyn oıatyp, talabyn ushtaýǵa úles qosqan Estaı aýylynyń jastaryna rızashylyǵyn bildirdi.
«Qazaqta «Týǵan jerge týyńdy tik» degen jaqsy sóz bar. Osy bir tálimdi támsildi aýyzben aıtyp qana qoımaı, is júzine asyrǵan jastardyń áserli áreketi bárimizdi súısintti. Bir kezderi ózimizdiń aýyldan bilim alyp, qanat qaqqan oqýshylarymyzdyń týǵan jerge at basyn buryp, búgingi atqarǵan sharýalary erteńgi baldyrǵandarǵa úlgi bolary anyq», dedi ol.
Sonymen qatar Estaı esimin ulyqtap, jastar arasynda nasıhattaý maqsatynda shaǵyn fýtboldan týrnır ótti. Estaı Berkimbaıulynyń kesenesine baryp, quran baǵyshtaýdan bastalǵan ıgilikti is-shara keshke deıin jalǵasty.
Toqsan aýyz sózdiń tobyqtaı túıini, uıymdastyrylǵan is-sharalardyń barlyǵy Estaı Berkimbaıulynyń esimin jańǵyrtýǵa, ult jadynan óshirmeýge baǵyttaldy.
Raýan QAIDAR,
jýrnalıst
Pavlodar oblysy
