Egizder 2000 jyly Aqtóbe qalasynda dúnıege kelgen. Oblys ortalyǵyndaǵy avtoparkterdiń birinde mehanık bolyp jumys istegen ákeleri Sabyrjan 2012 jyly dúnıe salǵan eken. Analary Ásel esepshi bolyp jumys isteıdi. Kishkentaıynan eńbekqor bolyp ósken Aman men Esen 2017 jyly Aqtóbedegi №40 orta mektepti támamdaıdy. Sol jyly eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtyna ınjener mamandyǵy boıynsha oqýǵa túsip, kýrsant atandy. Bir kezderi jaryqtyq ákeleri ushqysh bolsam degen nıetpen osy oqý ornyna túspekke baǵyn synaǵan eken. Densaýlyǵyna baılanysty ol armany oryndalmapty. Áıtse de áke armanyn oryndaý aǵaıyndy egizderge buıyrypty. Mektepte jaqsy oqyp, úlgili tártibimen úzdik oqýshy atanǵan Aman men Esenniń anasy úshin bul aq túıeniń qarny jarylǵan kún boldy. Kishkentaıynan áje tárbıesin kórip, úlkendi syılap, týǵan eldiń tarıhyn tanyp, dástúrin saqtaýǵa talpynyp ósken uldary úshin erekshe qýanǵan anasy aqsarbas aıtqan.
Áskerı tártipke mektepten daǵdylanǵan ekeýi ınstıtýttyń kún tártibine de jyldam beıimdelip ketti. Kýrsanttar arasynda bedelge ıe boldy. Kez kelgen jerde dostaryna kómek berýge daıyn turatyn. Berilgen tapsyrmany buljytpaı oryndaıdy. Bala kúninen fýtbolǵa qumar egizderdiń sporttyq, mádenı is-sharalardan qalys qalǵan kezi joq. Qazir de áskerı bólimniń fýtbol komandasynda jaqsy óner kórsetip júr. 2021 jyly joǵary áskerı oqý ornyn bitirip, «leıtenant» ataǵyn alǵan aǵaıyndy Bısembaılar alǵashqy kúnnen Aqtaý garnızonyndaǵy 30153 áskerı bóliminde qyzmet atqaryp keledi.
«Biz úshin áskerı mamandyqty meńgerip, Qarýly Kúshter qatarynda qyzmet etý – úlken abyroı, – deıdi Aman. – Ásirese anamyz bizdiń bul jetistigimizge erekshe qýandy. Eń bastysy, áskerı ómir ekeýimizge de unaıdy».
«Bir úıdiń álpeshtegen erkesi bolsaq ta, ómirdiń belesine birge órlep kelemiz, – deıdi aǵasynyń sózin jalǵaǵan Esen. – Qýanyshymyz da, qıynshylyǵymyz da bir. Úılený toıymyzdy da bir kúnde jasaıtyn shyǵarmyz. Ákemizden qalǵan qara shańyraqtyń tútinin tútetip, Aqtóbede naǵashy ájemizben birge turyp jatqan anamyzdy qolymyzǵa alsaq degen armanymyz bar.
«Úılenip, shańyraq kótermek oılaryń bolsa, sóz baılasqan qyzdaryń bar shyǵar?» degen saýalymyzǵa Aman: «Árıne. Olar da biz sekildi egiz. Stýdentter. Aqtóbede oqyp jatyr. Ázirge aty-jónderi qupııa bola tursyn», dep jymııa jaýap berdi. Áńgimemiz kúndelikti qyzmet taqyrybyna aýysqanda leıtenant Aman Bısembaı: «Bizdiń mamandyq asa joǵary jaýapkershilikti talap etedi. Ushaqtan áýede qandaı da bir aqaý shyqsa, ony qalpyna keltirý múmkin emes. Sol sebepti áýe kemesi kókke kóterilmeı turyp, jerde jiti tekserilýge tıis», dedi.
Rasynda, qyr-syry mol ınjener-tehnıkter qyzmetiniń jaýapkershiligi aýqymdy-aq. Máselen, bir ushaqtyń áýege kóterilýine on shaqty tehnıkalyq quramnyń mamandary qyzmet kórsetedi eken. Sol sebepti ushaqtardyń áýedegi qaýipsizdigine birden-bir jaýapty – tehnık mamandar. Olar kúndelikti ushýdyń aldynda bir kún buryn ushaqtardyń ushýyna daıyndyq ótkizip, ondaǵy avıasııalyq jabdyqtar men qarý-jaraq júıelerin jiti tekseredi. Ushar aldynda jalpy tekseris ótkizilip, sosyn baqylaý tekseris júrgiziledi. Sodan keıin ǵana ushýǵa ruqsat beriledi. Sondyqtan mamandar aptasyna bir ret ınjenerlik tehnıkalyq daıyndyqtan ótip turady. Antyna adal, sertine berik aǵaıyndy egizder leıtenant Aman men Esen Bısembaılar bolashaq Otan qorǵaýshy jastarǵa úlgi bolary anyq.
Muharbek MAHAMBET,
áskerı jýrnalıst
