Ekijaqty vızasyz rejim ornatýdyń Qazaq eli úshin paıdaly tustary kóp. Birinshiden, vızasyz rejim shaǵyn jáne orta bıznestiń damýyna múmkindik beretinin mamandar jappaı aıtyp jatyr. Ekinshiden, biz úshin qytaı medısınasynyń ıgiligin kórýine keńirek jol ashylady. Úshinshiden, týrızmniń damýyna yqpal jasaıdy.
Men – Jetisý oblysynan saılanǵan depýtatpyn. Bizdiń óńirdiń tabıǵaty keremet, ol jerde týrıster kóretin tamasha oryndar bar. Qazirgi kúni Alakól men Balqashqa jol salynyp, demalys oryndary kóptep ashylyp jatyr. Elimizdiń týrıster qyzyǵatyn taýly, ormandy, kóldi jerleriniń bári Qytaımen shekarada tur. Sondyqtan biz onyń múmkindigin barynsha paıdalanýymyz kerek. Jalpy aıtqanda, Qazaqstan muhıtqa shyǵatyn el bolmasa da, Qytaı – biz úshin alyp teńiz. Biz sol teńizdiń jaǵasynda otyrǵan el bolǵandyqtan, onyń ıgiligin múmkindiginshe paıdaǵa asyrýymyz kerek.
Vızasyz rejim merziminiń 14 kúnnen 30 kúnge uzartylýy «elge qara qytaı qaptaıdy» degen qaýipke negiz bolmaıdy. Ondaı jańsaq oıdan barynsha aýlaq bolǵanymyz durys. Sol sózderdi aıtyp jatqandardyń bári – buryn-sońdy Qytaımen baılanysy joq adamdar. Mysaly, Jarkent qalasy – shekaraǵa tıip turǵan eldi meken. Buǵan deıin qanshama qandasymyz beri asyp, tarıhı otanyna oralyp jatyr. Biraq osy 30 jyldyń ishinde Jarkentke qytaılar jappaı kóship kelip, qaptap jatqandyǵyn kórgen emespiz. Eger olar keletin bolsa, vıza bar kezde de kele berer edi ǵoı.
QHR Bilim mınıstrliginiń aqparaty boıynsha kórshi eldiń joǵary oqý oryndarynda kóptegen otandasymyz oqıdy. Sondaı-aq 2015 jyldan bastap Qytaıdyń Beıjiń, Shanhaı, Dalıan, Sıan qalalaryndaǵy joǵary oqý oryndarynda «Qazaqstan ortalyqtary» jumys istep keledi. 2022 jyldyń qarasha aıynda Shyǵys Qytaı pedagogıkalyq ýnıversıtetinde «Qazaqstandy zertteý ortalyǵy» resmı túrde ashyldy. Sonymen qatar Qytaıdyń joǵary oqý oryndarynda oqıtyn qazaqstandyq stýdentterdiń ata-analary óz balalaryna kedergisiz bara alady.
Bolat KERIMBEK,
Májilis depýtaty
