Almaty ákimi Erbolat Dosaevtyń tapsyrmasy boıynsha ótken jyldan bastap UOS ardagerleri kelesi baǵyttar boıynsha tegin medısınalyq kómek alady:
- Jalpy praktıka dárigerleri men naqtyly mamandardyń keńeıtilgen tekserýi;
- Jalpy klınıkalyq taldaýlardy alý;
- Kórsetkishter boıynsha tekserý, onyń ishinde EKG, ÝDZ, KT jáne MRT;
- Stasıonarda ońaltý, sondaı-aq sanatorıı-kýrorttyq emdeý;
- Stomatologııalyq kómek.
2023 jyldyń basynan beri TMKKK jáne MÁMS aıasynda UOS-nyń 3243 qatysýshysy jáne olarǵa teńestirilgen adamdar keńeıtilgen medısınalyq tekserýden ótti. Jyl sońyna deıin osy sanattaǵy almatylyqtardyń 100% - y keńeıtilgen medısınalyq tekserýden ótedi.
Barlyq júre almaıtyn naýqastardy aı saıyn ýchaskelik dárigerler nemese medbıkeler tekseredi. Dári-dármekterdi úıge tegin jetkizý uıymdastyryldy. Jyl sońyna deıin 3900-den astam ózdiginen júre almaıtyn pasıent úıinde tolyq medısınalyq tekserýden ótedi.
Bıyl 673 pasıentke stomatologııalyq kómek kórsetildi. Osy maqsattar úshin UOS ardagerleriniń qalalyq emhanasyna 2023 jylǵa Almaty bıýdjetinen 27 mln teńge bólindi.
Barlyq medısınalyq uıymdarda UOS ardagerlerine jáne olarǵa teńestirilgen adamdarǵa únemi estelik syılyqtar men azyq-túlik sebetteri tapsyrylady.
Sondaı-aq Almaty ákiminiń tapsyrmasy boıynsha áleýmettik qyzmet mamandary ardagerlerdi turaqty aralap turady. Olar ardagerlerge qandaı kómek qajet ekenin anyqtaıdy.
Mysaly, Naýryzbaı aýdanynyń ardageriniń kireberisiniń aǵash terezeleri jańasyna aýystyrylyp, esiginiń aldyna jańadan asfalt tóseldi. Alataý aýdanynyń ardagerine 1,5 mln teńgege sý qubyry men káriz jelisin tartý jumystary júrgizildi. О́tinishter ártúrli jáne eshqaısysy nazardan tys qalmaıdy.
Bıylǵy jyly qalalyq máslıhat depýtattarynyń sheshimimen UOS ardagerleri men olarǵa teńestirilgen adamdarǵa birjolǵy kómek somasyn ulǵaıtý maquldandy.
«О́kinishke qaraı, soǵys ardagerleri azaıyp barady. Almatyda 56 ardager turady. Men olardyń barlyǵy óz merekelerin aman-esen qarsy alǵanyn qalaımyn. Ardagerlerge kómek kórsetý úshin qarajat qarastyrylǵan. Biz árbir UOS ardagerine mıllıon teńgeden tóleýdi josparladyq, depýtattardan olarǵa 1,5 mln teńgeden tóleý úshin taǵy bes júz myń teńge qosýdy suradym», dedi qala ákimi ataýly kúnge tólem somasyn ulǵaıtý bastamasyna túsinikteme bergende.
Birjolǵy áleýmettik kómektiń jalpy somasy 85,5 mln teńgeni quraıdy.
UOS ardagerlerine teńestirilgen adamdarǵa da 100 myń teńgeden birjolǵy tólemder qarastyrylǵan. Eńbek maıdanynyń qatysýshylary, UOS qatysqan biraq qaıtys bolǵan ardagerler men múgedekterdiń áıelderi 50 myń teńgeden alady.
Jeńis kúnine oraı jalpy somasy 975,4 mln teńgeniń áleýmettik tólemderin 13 290 almatylyq alady.
