О́tken jyldyń qyrkúıek aıynda Almatyda tusaýy kesilgen Dımashtyń «Stranger» jeke konsertiniń baǵdarlamasy álem boıynsha saıahatyn bastady. Qazaqstanmen burynnan kele jatqan tarıhı dostyq qarym – qatynastary bar baýyrlas el - Túrkııa 6 mamyrda alǵash ret qazaqstandyq oryndaýshynyń aýqymdy shoýyn ótkizdi.
Dımashtyń jeke konserti Antalya Expo Kongre Merkezi-de ótti, ol daýyl týraly eskertýge baılanysty belgilengen kúnnen birneshe kún buryn aýystyryldy.
Shoýǵa álemniń 44 elinen kórermender keldi. Kórermender ártistiń ana tilinde oryndaǵan kompozısııalaryn tyńdap qana qoımaı, aǵylshyn, ıspan, ıtalıan, orys, fransýz, qytaı jáne japon tilderindegi ánderden de lázzat aldy.
Bul keshte talapty halyqaralyq tyńdaýshylardyń nazaryna aǵylshyn tilindegi «If I never breathe again», «Fly Away», «Screaming», «Give me your love» shyǵarmalary, qobyzdyń tereń únimen súıemeldenetin tıtýldyq án «Stranger», «Together» – Ábilmansur Qudaıbergenniń avtorlyq shyǵarmasy jáne ulttar men ulystar birliginiń mańyzdy habaryn jetkizetin Dımashtyń «The story of one sky» avtorlyq ánderi usynyldy.
Ár eldegi jeke konsertterinde Dımash baǵdarlamaǵa qabyldaýshy eldiń tilinde shyǵarmalardy engizýge tyrysady. Túrik jankúıerleri úshin túriktiń áıgili «Gesi Baglar» ánin oryndady. Qonaqjaı júrgizýshiler Dımashqa túrik ulttyq aspaby Baglamany syıǵa tartty. Dımash jyly qarsy alǵany úshin túrik jerine alǵysyn bildirip, qazaq pen túrik mádenıetiniń ortaqtyǵyn atap ótti.
Aıta keteıik, 2023 jyly 6 aqpanda Túrkııa men Sırııada qatty zilzala bolyp, saldarynan 50 myńnan astam adam qaza tapty. Osy qaıǵyly apatqa baılanysty kómek retinde Dımash Qudaıbergen álem boıynsha ótip jatqan jeke konsertterinen túsken qarajattarynyń bir bóligin baýyrlas elge aýdaratynyn aıtqan bolatyn.
