Qala tazalyǵyna jaýapty mekemede qazir 12 Aýǵan soǵysynyń ardageri jáne Chernobyl apatynyń zardabyn joıýǵa qatysqan azamat eńbek etedi eken. Ujymdastar jumystan bosaı qalsa, ardagerlerdi áńgimege tartyp, kórgen-bilgenin, túıgenin surap-bilýge áýes. El aǵalary da árkez áriptesterine aqyl-keńesin aıtyp, qoldaý kórsetýden qashpaıdy.
Aýǵan soǵysyna kútpegen jerden baryp, eki jyl maıdanda bolǵan Beısembek Narynov, qazir tazalyqqa jaýapty mekemede jumys isteıdi. О́zi – Astana qalasynyń týmasy. Qorǵaljynda ósken. Sol jaqtan áskerge ketip, 1979-1981 jyldary oralǵan.
– Onynshy synypty támamdap, sońǵy emtıhandy tapsyrǵan kúni áskerge alyp ketti. Qyrǵyzstannyń Osh qalasyna tarttyq. Ol kez jaspyz ǵoı. Soǵysqa baratynymyzdy da bilgen joqpyz. Úsh aı óter-ótpesten bir kún áskerı bólimde dabyl soǵylyp, jolǵa shyǵyp kettik. Tájikstanǵa aı júrip jettik. Sodan 1979 jyldyń jeltoqsanynda Aýǵanstanǵa kirdik. Soǵysqa jibergenin áýelde biz bilmedik. Aýǵanstannyń birneshe qalasyna kirdik. Talaı ret ajaldan aman qaldyq. Soǵystyń zobalańy degen – osy, – dep eske aldy ardager.
Beısembek Narynov «Astana tazalyq» seriktestigine 2002 jyly kelgende mashınıst bolǵan. Sodan beri bir mekemede taban aýdarmaı eńbek etip, eńbek ardageri degen atqa da laıyq bolyp otyrǵan jaıy bar. Sebebi ardagerdiń ózi únemi «Eńbekke adal bolsań, jumystyń barlyǵy jaqsy» dep jastarǵa únemi eskertip otyrady eken.
