Rýpı Kaýr esimi búginde álem oqyrmandaryna jaqsy tanys. «Sút pen bal» óleńder jınaǵy New York Times-tiń bestseller kitaby atanǵan qalamger arýdyń túp-tamyry úndilik. Qazir Kanadada turatyn ol áleýmettik jelide belsendi. Rýpı Kaýr áleýmetshil, qoǵamdyq ahýaldardy batyl jazatyn, júrekke, jan quzaryna úńile biletin aqyn. «Sút pen baldaǵy» qysqa ǵana aq óleńder oıly oqyrmandy ári-sári kúıge túsiredi.
«Sen
qaısar qadamdaryńmen
shegelediń aıaǵymdy jerge.
Sosyn
turýdy talap ettiń...
Nemese,
Men ony súıýdi úırenemin
ózimdi súıý arqyly...»
«Sút pen bal» tórt bólimnen quralǵan. Birinshi bólim – muń, ekinshi – mahabbat, úshinshi – jarylys, tórtinshi – emdelý bólimi. Rýpı Kaýrdyń qysqa da qoǵaly oıly aq óleńderinen lázzat alýǵa sezimtaldylyǵyn joǵaltpaǵan júrek, balańdyǵyn joǵaltpaǵan sergek kóńil kerek. Áıtpegende, jan ulpasy semip, júregi qataıǵan jandar úshin jınaq bos sıtatalar qurylymy bolyp kórinýi bek múmkin.
«Men qara jerge
shym batqym keledi
kóz jasy, aıaǵym
qolym
tereńge ený úshin...
Nemese,
Eń birinshi
Tile ózińe,
qalǵan ǵumyryńdy,
óz ońashalyǵyńda ótkizýdi...»
Kaýr synı mysqyl arqyly Shyǵys Azııadaǵy áıelder máselesin, olardyń basynan arylmaǵan qıturǵy saıasatty batyl kótere bildi. Kitapta turmystyq zorlyq-zombylyq, onyń zardaptarynan týyndaǵan psıhologııalyq komplekster, jaltaq ǵadetter, boıdan sýyrǵanmen izi qalǵan jalǵan nanymdar kestelengen. Áıel áleminiń árneshik kúıi men shuńǵyma syrlary kitapta jan-jaqty kórinis tapqan. Kaýr áldebir toptardyń soıylyn soǵýdan, nasıhattalǵan uǵymdardyń jetegine erýden aýlaq. Kerisinshe fılosofııalyq, psıhologııalyq turǵyda másele mánin ashýǵa yntyq.
«Seniń qanyń,
meniń qantamyrymnan aǵady.
Aıtshy,
muny qalaı
umyta alarmyn?»
Keıbir qysqa qos tarmaqtardan danalyq lebi seziledi.
«Jumsaq bolý
qudiretti bolý
degen sóz...»
«Sút pen bal» – mahabbat, joǵaltý, zorlyq-zombylyq, tazarý, áıel qupııasy jaıly kitap. Ár bólimi náýrizek muńǵa endirip qana qoımaı, odan emdelý jolyn nusqap, joba kórsetedi. Oqyrmandy teńizine shomyldyrǵan, ózin taný jolynda maıak bola bilgen jınaq qazaq oqyrmanyna jetip, tól tilge aýdarylsa nur ústine nur.
