Ofıserlerdiń bastamasyn L.N.Gýmılev atyndaǵy Eýrazııa ulttyq ýnıversıtetiniń áskerı kafedrasy, Qarýly Kúshterdiń ardagerleri, «Aýǵan soǵysy jáne jergilikti qaqtyǵystar ardagerleri odaǵy» qoǵamdyq birlestiginiń músheleri qoldap, is-sharaǵa belsendi qatysty.
Tárbıe jáne ıdeologııalyq jumystar departamentiniń bastyǵy, ádilet polkovnıgi Tileýhan Basqojaev Ekinshi dúnıejúzilik soǵystyń ardageri Raısa Safonıchevany jáne áleýmettik mekemeniń turǵyndaryn Jeńis kúnimen quttyqtap, beıbit ómir tiledi. «Biz úshin sizdiń urpaq – batyldyq pen tańǵajaıyp ómirsheńdiktiń úlgisi. El basyna kún týǵan qıyn ýaqytta Jeńis úshin bári tyldaǵy eńbekke jegildi. Biz bul qaharmandyqty balalarymyz ben nemerelerimizge únemi aıtyp otyramyz», dedi ol.
Aldaǵy shildede Raısa Safonıcheva 98 jasqa tolady. 1943 jyly Mınskide qysqamerzimdi baılanys kýrsyn aıaqtaǵannan keıin ol 2-Ýkraına maıdanyna jiberiledi. Kıevten Býdapeshtke deıingi maıdan joldaryn júrip ótip, Jeńis kúnin qarsy aldy. Ardager osy eńbegi úshin II dárejeli «Otan soǵysy» ordenimen, «Ýkraınany azat etkeni úshin», «Germanııany jeńgeni úshin» medaldarymen jáne basqa da nagradalarmen marapattalǵan.
Is-sharada dala ashanasy uıymdastyrylyp, armııalyq shatyrlar ornatyldy. Aksııaǵa qatysýshylar dástúrli sarbaz botqasynan dám tatty.
Búginde «Sharapat» ortalyǵynda 329 adam turady. Olardyń arasynda «1941-1945 jyldardaǵy Uly Otan soǵysyndaǵy eren eńbegi úshin» medalimen marapattalǵan tyl eńbekkerleri, eńbek ardagerleri bar.
Qarýly Kúshter Ulttyq áskerı-patrıottyq ortalyǵynyń shyǵarmashylyq ujymy mekeme qonaqtary men qyzmetkerlerine soǵys jyldaryndaǵy ánderdi shyrqap berdi. Qarııalar da qurmet kórsetken áskerı qyzmetshilerge alǵystaryn jaýdyrdy.
