BRIýSSELDIŃ SIMVOLY

Belgııa astanasyndaǵy Atomium (Atomıým) ǵımaraty Brıýssel sımvoldarynyń biri bolyp tabylady. Onyń qurylysy 1958 jyly osy qalada Búkilálemdik kórme (EKSPO) ashylardyń qarsańynda salynǵan. Keshenniń jobasyn arhıtektor Andre Vaterkeın jasaǵan. Ol atom ǵasyrynyń sımvoly jáne onyń energııasyn beıbit maqsatqa jumsaý lozýngisi retinde ómirge kelgen. Keshenniń qurylysy Andre jáne Mıshel Polak bastaǵan arhıtektorlardyń basshylyǵymen júrgizilgen.

Basynda qalaıy qospasymen kómkerile jasalǵan qurylys 2006 jyly aqpanda kúrdeli jóndeý jasalǵannan keıin bolat qaptamamen almastyrylǵan. Ol 165 mıllıard ese ulǵaıtylǵan pishindegi temirdiń krıstall fragmenti kýbyna biriktirilgen toǵyz atomnan turady. Atomıýmnyń bıiktigi 102 metr bolsa, salmaǵy 2400 tonnaǵa jýyq, al árbir toǵyz sferanyń dıametri 18 metrdi quraıdy. Bul sferalardyń altaýy kelýshilerdi qabyldaı alady. Sferalar ózara uzyndyǵy 23 metrlik turbalarmen jalǵasqan. Bulardyń ortasynda eskalatorlar men jalǵaýshy dálizder ornalasqan. Sharlar arasyna barlyǵy 20 jalǵaýshy turbalar tartylǵan. Olardyń ortasyndaǵy bóliginde kelýshilerdi 25 sekýndta keshenniń eń basyndaǵy restoran men panoramaly platformaǵa jetkizetin lıft bar. «Atomıýmnyń» syrttaǵy aýlasynda Eýropa elderindegi belgili ǵımarattardyń kishkentaı kóshirmeleri qoıylǵan «Mını-Eýropa» atty ashyq aspan astyndaǵy saıabaq-kórme ornalasqan. Biz Brıýsselde bolǵan úsh kúnimizdiń ekinshisinde osy «Atomıým» men «Mını-Eýropa» kórmesin aralap kórdik. «Atomıým» bizdiń «Báıterekke», al «Mını-Eýropa» alańy «Atamekenge» qatty uqsaıdy eken. Bulardyń aldyńǵysynyń ushar basyndaǵy platformadan Brıýssel alaqanda turǵandaı áser beredi. Aıtary joq, keshenniń mańy aǵashqa tunǵan saıabaqqa toly eken. Jalpy, qala bul jerden tipti ádemi bolyp kórinedi. Serik Pirnazar.