Sonymen qatar sharýalardyń joǵary suranysyn eskere otyryp, forvardtyq satyp alý baǵdarlamasy jalǵasyn tapty. Jalpy, «Azyq-túlik kelisim shart korporasııasy» AQ UK bıylǵy jyly aýyl sharýashylyǵy ónimderin forvardtyq satyp alýǵa jáne taýarlyq kredıtter berýge keminde 70 mlrd teńge baǵyttaıtyn bolady. Bul baǵyttar egis naýqany kezeńinde aýyl sharýashylyǵy taýaryn óndirýshilerdi qoldaýdyń pármendi quraldary bolyp esepteledi.
Búginde «Azyq-túlik kelisim shart korporasııasy» forvardtyq satyp alý baǵdarlamasy boıynsha 21,2 mlrd teńge bóldi jáne jalpy somasy 20,3 mlrd teńgege sharýalardyń ótinimi qarjylandyryldy. Qarajat ÁKK-den qaıtarýǵa tıisti kepildikter bergen fermerlik sharýashylyqtardyń shottaryna aýdaryldy. Osylaısha, qazirgi ýaqytta 280,1 myń tonna aýyl sharýashylyǵy ónimine kelisimshart jasaldy. Onyń kóp bóligi bıdaı, arpa jáne kúnbaǵysqa tıesili.
Azyq-túlik korporasııasy bıyl bıdaı, arpa, suly, qaraqumyq, kúnbaǵys, maıly zyǵyr, raps jáne soıadan bólek, alǵash ret Qyzylorda oblysynyń aýyl sharýashylyǵy taýaryn óndirýshilerinen 1,2 mlrd teńgege 6 myń tonna kóleminde kúrish jarmasyn forvardtyq satyp aldy. Forvardtyq satyp alýmen qatar, bıdaı men arpanyń maqsatty taýarlyq nesıesi aýyl sharýashylyǵy taýaryn óndirýshilerdi qoldaýda suranysqa ıe bolǵan qajetti quraldyń biri boldy.
Qazirgi ýaqytta 72 aýyl sharýashylyǵy taýaryn óndirýshiden 566 myń tonna kóleminde taýarlyq kredıt berýge 83 ótinim kelip túsken. Onyń ishinde 500 myń tonnadan astam astyqqa ótinimder maquldanypty. Qalǵandary qaralyp, oblystardyń úılestirý keńesterine bekitýge jiberilgen.
ÁKK-niń kepildikteri negizinde 293 myń tonna kóleminde taýarlyq kredıtter berildi. Qalǵan jasalǵan sharttar boıynsha tıisti kepildikter beriledi dep kútilip otyr.
Taýarlyq kredıt berýge ótinimderdi maquldaý kórsetkishi shamamen 97 paıyzdy quraıdy. Aýyl sharýashylyǵy mınıstrliginiń habarlaýynsha, ótinimderdiń qabyldanbaýy áleýetti kontragentterdiń qanaǵattanarlyqsyz qarjylyq jaǵdaıyna baılanysty boldy.
«Taýarlyq nesıe berý mehanızmi fermerlerge óz aqshalaryn salmaı-aq, «Azyq-túlik kelisimshart korporasııasynyń» astyǵyn ózderiniń óndiristik josparlaryn júzege asyrý úshin paıdalanýǵa múmkindik beredi. Sharttar boıynsha mindettemelerdi oryndaý merzimi 2023 jylǵy 1 qarashaǵa deıin dep bekitildi. Azyq-túlik korporasııasy kúzgi kezeńde astyqtyń jetkizilýine qaraı onyń rezervtik qoryn jańartýdy qamtamasyz etedi, eldiń mal ósirýshileri men qus ósirýshileri úshin jem-shóp qoryn qalyptastyryp, un tartý jáne basqa da óńdeý kásiporyndary úshin astyq rezervin qurady. Osy rette maýsymaralyq kezeńde satyp alynǵan kólemder belgilengen baǵa boıynsha satylatyn bolady, bul daıyn ónimniń baǵasyn jyl ishinde turaqtandyrýǵa múmkindik beredi», delinedi vedomstvo habarlamasynda.
