«Aı nury araıly
Aıdynǵa taraıdy,
Súıiktim keler me, ıapyrmaý?», deıdi…
Ánniń boıynda azaly muń bar. Saryla kútken saǵynysh bar. Qaıǵyly taǵdyr bar.
Birde kompozıtor Mels О́zbekov Qamshybek Aqataevqa ánniń shyǵý tarıhy týraly aıtqan eken.
«Bul meniń konservatorııada oqyp júrgen kezim edi. Almaty medısınalyq ınstıtýtynyń Aıymzada esimdi qyzyna ǵashyq boldym. Janarlarymyz ottaı janyp, qos júrek birin-biri túsinip, mahabbattyń sharabyna mas bolyp júrgenimizde, jazǵy kanıkýl da kelip qaldy. «Jańa oqý jyly bastalǵansha...» dep, ekeýmiz bir-birimizdi qımaı, ol óziniń aýyly Almaty mańyna, men Lýgovoıǵa kete bardyq. Alǵashqy kezde Aıymzada habaryn aıtyp, hat kelip turýshy edi. Sońyra onyń izi sýǵa sińgendeı ǵaıyp boldy. Sebebin surap, hat jazaıyn desem, ol: «Úıge hat jazba, ata-anam bilip qoısa, uıat bolady» degen soń kanıkýldyń bitýin kúttim.
Úzdigip kútken jańa oqý jyly da bastalar ýaqyt keldi. Men aýyldan qustaı ushyp Almatyǵa kelsem, Aıymzada áli kelmepti. Eki kózim tórt bolyp otyrǵanda, kýrstas qyzdardyń biri kelip, Aıymzadanyń kanıkýl kezinde shomylyp júrip, sýǵa ketip qaıtys bolǵanyn aıtty. Men kezdeısoq seń soqqandaı kózim qaraýytyp, otyryp qaldym», deıdi ol esteliginde.
Án kópshilikke Dýlat Isabekovtyń shyǵarmasy jelisinde túsirilgen «Gaýhartas» fılmi arqyly tanymal bolǵandyqtan ekran betinde «ánniń sózin jazǵan - Dýlat Isabekov» dep jazylyp júrgen. Biraq án jınaqtarynda ánniń sózin jazǵan avtor Ábdirahman Asylbek ekeni kórsetilgen.
Kórikti kól beti,
Kók eles kólbedi,
Men turmyn jaǵada jabyrqaý.
Aı nury araıly
Aıdynǵa taraıdy,
Súıiktim keler me, ıapyrmaý?
Aıdyn kól, sen aıtshy,
Samal jel, sen aıtshy,
Jaryma qus bolyp ushaıyn.
Bir habar bershi, aıym,
Jaqyndap kelshi, aıym,
Lapyldap máńgi qushaıyn.
Aıym bop qalqyshy,
Qaıyń bop balqyshy,
Qyzyqty kóktemniń keshinde.
Jarasty únimiz,
Jarasty jyrymyz,
Terbeldik aıdyn kól tósinde.
Gúlim bop ańqydyń,
Nurym bop shalqydyń,
О́rtedi tánimdi ot lebiń.
Baqytty shaqtarda,
Jaqutty baqtarda,
О́zińmen birge kóktedim.
Ábdirahman Asylbek
