Sýretterdi túsirgen Erlan OMAR, «EQ»
Festıvaldyń maqsaty – ómirden erte ozǵan daryndy oqýshy, fızıka, robottehnıka salalary boıynsha respýblıkalyq, halyqaralyq pándik olımpıadalar men ǵylymı jobalardyń birneshe dúrkin jeńimpazy Álıhan Serikzatuly Maqsuttyń ǵıbratty ǵumyryn mektep oqýshylaryna úlgi ete otyryp, elimizge qajetti bolashaq tehnık mamandardy daıarlaýǵa qoldaý kórsetý, sondaı-aq oqýshylar jasaǵan ınnovasııalyq jobalar men ónertabystardy halyqqa keńinen nasıhattaý.
Is-sharany L.N.Gýmılev atyndaǵy Eýrazııa ulttyq ýnıversıteti, «Astana daryny» daryndy balalar men talantty jastardy anyqtaý ortalyǵy, №9 «Zerde» mamandandyrylǵan mektebi, «Robotek» robottehnıka mektebi jáne Álıhan Maqsut atyndaǵy Daryndy balalardy qoldaý qory birlesip uıymdastyrdy. Qordyń basshysy – Álıhan Maqsuttyń ákesi, belgili aqyn Serikzat Dúısenǵazy atap ótkendeı, festıval jyl saıyn mamyr aıynda dástúrli túrde uıymdastyrylady. Daryndy oqýshylardyń ǵylymı daǵdysyn shyńdaý úshin festvaldy keleshekte respýblıkalyq, halyqaralyq deńgeıge kóterý josparlanyp otyr.
Festıvaldyń ashylý rásimine qatysqan «Amanat» partııasynyń atqarýshy hatshysy, Májilis depýtaty Elnur Beısenbaev sol kóshti bastaıtyn elderdiń qatarynda bolý úshin ǵylym men tehnologııaǵa den qoıý kerektigin alǵa tartty. «Ǵylym damysa, elimiz de damıdy. Sonda jastar arasynan álem moıyndaǵan ǵalymdar sýyrylyp alǵa shyǵady. Osy oraıda mundaı festıvaldardyń alatyn orny erekshe ekenin atap ótý kerek», dedi ol.
S.Dúısenǵazy ǵylymmen aınalysyp júrgen jastardy nasıhattaý, olarǵa qoldaý kórsetý qajet ekenin atap ótti. «Elimizde ǵylym, tehnıka, ınjenerııa salasynda jas ta bolsa jańalyq ashyp, qabilet-qarymyn tanytyp júrgen jetkinshekter az emes. Tipti shetelde bilim alyp kelip, ǵylymǵa jany qushtar shákirt tárbıelep júrgen daryndy azamattar bar aramyzda. О́kinishtisi sol, el erteńine eleńdegen ustazdardy, olar baptap otyrǵan oqýshylardy izdep baryp, isin elge tanytyp jatqan eshkim joq. Elimizdiń bolashaǵy – tehnologııada. Jas ǵalymdarymyzǵa qoldaý kórsetip, shabytyna shabyt qosatyn, qııalyna qanat bitiretin – sizder men bizder», dedi ol.
Jıynǵa Parlament Májilisi Áleýmettik-mádenı damý komıtetiniń tóraǵasy, eks-mınıstr A.Q.Aımaǵambetov bastaǵan bir top depýtat qatysyp, sóz sóıledi.
Festıval barysynda belgili kınorejısser Murat Esjan túsirgen «Álıhannyń armany» atty derekti fılm kórsetildi.
Al júzden júırik shyqqan oqýshylarǵa qomaqty qarjylaı syılyqtar tabys etildi.
