Batys Qazaqstan oblysy Zelenov aýdanynyń Peremetnoe aýylynan ortalaý mektepti bitirip, Hromtaýda turatyn apasynyń úıinde turyp, Aqtóbedegi medısınalyq kolledjde oqyp júrgen jas qyz Rahatpen tanysyp, jigittiń otbasyn qurý týraly usynysyn qabyl alady. Qazaq jigitine turmysqa shyǵý týraly usynysyna Oraldaǵy Larısanyń ata-anasy da qarsy bolmapty. Qazir olardyń tórt balasy erjetip keledi.
«Bizdiń aýyldaǵy kórshilerimizdiń bári – qazaqtar. Kishkentaıymnan qazaqsha sóıledim, qazaqshaǵa jaqyn boldym. Hromtaýdyń jigitine, onyń ústine bir otbasynyń kenje ulyna turmysqa shyǵamyn degenimde, ata-anam qarsy bolǵan joq. Olar «eń bastysy ózińniń adamyńdy tapsań boldy» dedi. Rahattyń ata-anasy da meni óte jyly qabyldady. Qaıyn atam buryn joldastaryna: «Balam orystan kelinshek alady, kelinim maǵan dámdi etip borsh pisirip beredi» dep jıi qaljyńdaıdy eken. Atam áli kúnge deıin osy qaljyńyn únemi eske alyp, bizdi kúldiredi. Atam men úlken enem aq batasyn berip, aǵaıyn-týysty jınap, toıymyzdy jasady. Erim – shańyraqtaǵy jalǵyz ul ári úıdiń kenjesi. Biz búginde atam, qaıyn apam, úlken enemmen birge turamyz. О́z enem ómirden erterek ótip ketken», deıdi Larısa.
Larısa otbasylyq ómirdiń ystyq-sýyǵyna tóze bilýdegi qarapaıym qaǵıda – keńpeıildilik pen syılastyq, deıdi.
«Eń bastysy otbasylyq ómirde barlyq nárseni qıyndatpaı, jeńil qabyldaı bilý kerek. Qazaq – úıinen qonaǵy úzilmeıtin, aǵaıyn-týysymen aralas-quralasy kóp halyq. Jalpy, men ashyq adammyn, úıge qonaq kelgendi jaqsy kóremin. Alǵashqyda bári de qyzyq bolyp kórinetin. Úlkenniń aldynan kese ótpedim, úıde atamyzdyń aıtqany zań boldy. Shynymdy aıtsam, jastyqtyń býymen bastapqyda eshqandaı qıyndyqty sezinbedim. Keıin tuńǵyshymyz dúnıege kelgende joldasym ekeýimiz aqyldasa otyryp, ortaq sheshim qabyldaýdy ádetke aınaldyrdyq. Úıimizde jyl saıyn aıt meıramynda qonaqtar shaqyryp Quran baǵyshtaımyz, qysta soǵym soıǵanda kórshi-kólem, aǵaıyn-týys, aýyldaǵy úlkenderdi shaqyryp sheke berý dástúri úzilmeı keledi. Jyl saıyn qysta jylqynyń etin súrlep qoıamyn. Úıde kóbine et asylady. Bárimizdiń súıikti taǵamymyz – et. Qazaq kelini salt-dástúrdi sińirip jetilýi kerek. Dilnaz, Ásem, Ashat, Rasýl esimdi balalarymyz bar. Úıde bárimiz tek qazaqsha sóılesemiz», deıdi Larısa otbasylyq ómiri jaıynda.
Jalpy, Larısa turaqtylyqty unatady. Oqý bitirip, turmysqa shyqqannan keıin Dóń taý-ken baıytý kombınatynyń «Eýrazııa» medısınalyq ortalyǵynda, odan keıin de óndiristik sehtarda medbıke bolyp jumys istedi. Biraz jyl buryn mamandyǵyn ózgertti. Dekrettik demalystan shyqqan soń oǵan osy kásiporynnyń elektr sehyna jumysqa kirý týraly usynys túsken. Osy mamandyqqa qaıta oqyp, tájirıbeden ótip, elektr monteri bolyp jumysqa kirdi. Jubaıy Rahat 25 jyl kombınatta shahter bolyp jumys istep, búginde brıgadırlikke aýysty. Ujymda túrli ult ókilderi jumys isteıdi eken. Olardyń bári bir-birimen jaqsy syılastyqta.
Larısa otbasylyq ómirdi endi bastaǵaly jatqan jastarǵa «eń áýeli júrektiń qalaýyn tyńdaý kerek» deıdi. Osy oıy mamandyq tańdaýǵa da qatysty: «Sol kezde barlyǵy bir-birimen úılesim taýyp, adam maǵynaly ómir súredi. Otbasynda barlyǵy jaqsy bolsa, óziń de, jan-jaryń da jumysynda alańsyz júredi. Alańsyz eńbek – qaýipsiz eńbektiń alǵysharty. Ásirese, bul óndiriste óte mańyzdy», dep oı túıedi ónegeli shańyraqtyń uıytqysy bolyp otyrǵan ana.
Aqtóbe oblysy
