12 mamyr kúni Ekinshi dúnıejúzilik soǵysynyń ardageri, belgili jýrnalıst-jazýshy Ásken Nábıevtiń 100 jyldyǵyna arnalǵan «Barmysyńdar, armysyńdar babalar» atty eske alý keshi ótti.
Keshke Qazaqstannyń tuńǵysh ǵaryshkeri Toqtar Áýbákirov, jazýshy Jabal Erǵalıev, jýrnalıst Bádýan Imashuly syndy belgili azamattar qatysty.
Merekelik shara Ásken Nábıevtiń shyǵarmalary boıynsha maıdan ómirinen syr tartqan teatrlyq qoıylymmen ashyldy. Qoıylym arqyly kórermen qan-qasap soǵys jyldaryna oı jiberip, erlikke toly ómir órnegin kórdi. Munan soń Prezıdent Ákimshiligi Basshysynyń orynbasary Aıda Balaevanyń quttyqtaý hatyn qalalyq Ishki saıasat basqarmasynyń bólim basshysy Aıdana Baqytjanqyzy oqydy.
– Daryndy jazýshy, qarymdy jýrnalıst soǵys ardageri Ásken Nábıevtiń 100 jyldyq mereıtoıyna arnalǵan eske alý keshi qutty bolsyn. Ásken atamyz surapyl soǵys jyldary janqııar erlik pen otanyn qorǵaǵan erjúrek batyrlar sapyndaǵy taý tulǵa. Sondyqtan bolashaq úshin keýdesin oqqa tosyp, basyn báıgege tikken ardager atamyzdy eske alýǵa arnalǵan ǵasyr toıy bir áýlettiń ǵana emes, tutas halyqtyń qýanyshy, –dedi ol.
Sonymen qatar Parlament Senatynyń tóraǵasy Máýlen Áshimbaev pen Aqparat jáne qoǵamdyq damý mınıstri Darhan Qydyráliniń quttyqtaý hattary oqyldy.
Munan soń qalamgermen qatar júrgen jýrnalıst Bádýan Imashuly eski jyldardan syr tartty.
– Ásken aǵamen sonaý ótken ǵasyrdyń 1966 jyly Qorǵaljyn aýdanynyń mádenıet saraıynda tanysyp edik. Ol kezde mektep oqýshysymyn. Mektepte qolymyzdan qalam túspeıtin, óleń jazatynbyz. Birde Aqmoladan Qorǵaljynǵa Ásken aǵamyz, Nurǵoja Oraz, Seıitjan Omarov, taǵy da bes-alty aqyn-jazýshy kelip mektepte kezdesý keshin ótkizdi. Sonda Ásekeń bastaǵan qaýym árqaısymyzǵa jol kórsetip, joba nusqady. Aǵamyz zııaly, júzi jarqyn, bolmysy bıik edi. Keıin áriptes bolyp, birge qyzmet istedik. Ásken aǵamyz jazýshylyǵymen qatar kóptegen pýblısıstıkalyq dúnıeler jazdy. Adamgershiligi mol, ar-uıaty joǵary jan edi,– dedi ol.
Sonymen qatar jazýshynyń uly, qoǵam qaıratkeri Marat Áskenuly sóz alyp, ákesi jaıly jaıdary esteligimen bólisti.
– Biz otbasymyzda on balamyz. Ákem bala kúnimizden ártúrli aspapta oınap, kúrdeli shyǵarmalar tyńdatatyn. Bizge munyń bári qalypty dúnıedeı kórinetin, alaıda jyldar ótken soń bul úlken óner ekenin baǵamdadyq. Aqmolada oqyǵan týystarymyzdyń kóbi bizdiń úıde turdy. Keıde ákem án bastap, bárimiz soǵan qosylatynbyz. Ákem basylymǵa feletondar jazyp, keleńsiz dúnıelerdi synap otyratyn. Ádiletsizdikke, jalǵandyqqa jany qas edi. О́zi uzaq jasap nemere, shóbere kórip úlgerdi. Qazaqta «óli rıza bolmaı, tiri baıymaıdy» degen maqal bar. Barlyqtaryńyzǵa alǵysymdy bildiremin, – dedi.
Kesh sońynda Marat Áskenuly qadirli qonaqtardy «Ásken Nábıevke 100 jyl» mereıtoılyq tósbelgisimen marapattap, rızashylyq bildirdi.
Mereıtoıda «Qorqyt» etno-ansambli óner kórsetip, keshtiń kórigin qyzdyrdy. Sondaı-aq merekelik is-shara aıasynda qalamgerdiń ómiri men shyǵarmashylyǵyna arnalǵan fotokórme uıymdastyryldy.
Aıta keteıik, Ásken Nábıevke arnalǵan is-shara munymen toqtamaq emes, aldaǵy ýaqytta mereıtoı aıasynda ǵylymı-tájirıbelik konferensııalar, kórmeler, respýblıkalyq úzdik shyǵarmalar jáne kórkemsýret baıqaýlary men t.b. is-sharalar uıymdastyrý josparlanyp otyr.
