Sondaı oqıǵalardyń biri taıaý kúnderi elordamyzdyń Q.Rysqulbekov kóshesinde tirkeldi. 45 jastaǵy er adam 6-qabattyń terezesinen sekiremin dep qoqan-loqy jasaıdy. Turǵyndardyń shaqyrýyna der kezinde kelgen tártip saqshylary Ádilet Dalabaev pen Nurǵazy Marat jaǵdaıdyń jaı-japsaryn anyqtap, turǵyndy qutqarý sharalaryn qabyldaıdy. Bireýi tómende sýısıd jasamaqshy bolǵan azamatty raıynan qaıtarýǵa tyrysyp áńgimege tartady, ekinshisi asa saqtyqpen onyń páterine enip, artynan dybyssyz kelip qaýsyra qushaqtap alady. Osylaısha, ólim aýzynan arashalap qaldy. Qutqarylǵan er azamattyń mundaı qadamǵa barýyna ne ıtermelegenin mamandar anyqtap jatyr.
Taǵy bir oqıǵa Pavlodar oblysynyń Ekibastuz qalasyndaǵy kópqabatty úılerdiń birinde boldy. 13 mamyr kúni saǵat 13.40 shamasyndy Polısııa basqarmasynyń kezekshi bólimine S.Toraıǵyrov kóshesinde ornalasqan bes qabatty úıdiń tóbesinen er adamnyń sekirgeli turǵany týraly habarlama kelip túsken. Oqıǵa ornyna dereý jetken ýchaskelik polısııa ınspektorlary Nursultan Serikbaev pen Máýlet Qarybaev «Maǵan jaqyndamańdar! Áıtpese qazir sekirip ketemin!» dep aıqaılap turǵan jigitti kóredi.
– Tóbege kóterilip, onymen sóılese bastadym. Ýaqyt sozý úshin suraqtar qoıdym. Ol búgin óziniń týǵan kúni ekenin jáne ony bir adamdar renjitkenin aıtty. Men soǵan bola sekirmeı-aq, ekeýmiz birge osy máseleni shesheıik dep usynys tastadym, – deıdi Nursultan Serikbaev. Er azamatty aldaýsyratyp kóńiline jol taba bilgen ýchaskelik polıseı ony ózine tartyp, raıynan qaıtardy. 28 jastaǵy turǵyn dárigerlerge tapsyryldy.
Búginde eresekterdi bylaı qoǵanda, on ekide bir gúli ashylmaǵan, áli ómir kórmegen bozbalalar men boıjetkender arasynda da sekirip ólýge talpynýshylar az emes. Úlken adamdardy ómirdiń qıyndyǵyn kórdi dep aqtaýǵa bolatyn shyǵar, al jasóspirimderdiń mundaı qadamǵa barýyna ne sebep? Máselen, jaqynda oraldyq polıseıler kópqabatty úıdiń shatyrynan sekirmek bolǵan jasty qutqaryp qaldy.
Sýısıd jasaǵysy kelgen keıipkerimiz – 15 jastaǵy jetkinshek. 102 arnasyna kámeletke tolmaǵan qyzdyń joǵalyp ketkeni týraly aqparat 12 mamyr kúni keshke kelip túsken. Departamenttiń barlyq jeke quramy ony izdeýge jumyldyrylady. Qyz erteńine, ıaǵnı 13 mamyr kúni tańerteń kópqabatty úıdiń tóbesinen sekirgeli turǵan jerinen tabylǵan. Iývenaldy polısııa ınspektorlary Ramazan Jádigerov pen Ádil Saqypkereev jetkinshekti ýaqytynda raıynan qaıtaryp, aman alyp qaldy. Qazir onymen psıhologter jumys istep jatyr. Oqıǵanyń sebepteri boıynsha tergeý áreketteri júrgizilýde.
Kókshetaý qalasynda da 14 jastaǵy qyz shatyrdan sekirip ólmek bolǵan. Biraq tártip saqshylarynyń saýatty ári ýaqtyly áreketi arqasynda órimdeı jas aman qalǵan. Jedel baılanys ortalyǵyna qońyraý shalǵan adam óziniń tanysy Abaı kóshesindegi kópqabatty úıdiń tóbesinen sekirýge kóterilgenin habarlaıdy. Oqıǵa ornyna patrýldik polıseıler Beıbit Sadyqov pen Ádilhan Qoıbaǵar, sondaı-aq polısııanyń tirek pýnktinde bolǵan qyzmetker Narıman Nurjaqsın keledi. Jaǵdaıdy birden baǵalaǵan olar oılanbastan joǵaryǵa qaraı júgirip, 12-qabatty úıdiń shatyrynda turǵan 2009 jylǵy jasóspirimmen sóılesip, raıynan qaıtara aldy.
