Qazaqta naǵashysy jıenine jıen quryq beredi. Bul burynnan kele jatqan dástúr. Onyń mólsheri malmen, qyryq serkeshpen, esepteledi. Qyryq serkeshtiń quny qyryq shubarala taıǵa teń. Naǵashysy tıisti mólsherdi toltyryp bere almasa jıen 3 márte jıendik jasaýǵa quqyly bolady. Iаǵnı naǵashysynan ruqsat suramaı-aq júırik atyn, nar túıesin, qyran qusyn ala alǵan. Ol úshin eshkim oǵan aıyp taǵa almaıdy.
Qazaqta jıendi urǵannyń qoly qaltyraıdy degen sóz bar. Ol sóz jıendi urýǵa bolmaıtyndyqtan jáne jıenniń nazasy aýyr bolatyndyqtan aıtylǵan deıdi.
Sondaı-aq Ádil Ahmetov «Túrki áleminiń yrym-tyıymdary» kitabynda mynandaı derek keltiredi: «Qazaq dástúrinde kúıeýdiń qaıyn atasynyń qolynda bolatyn jaıttar sırek te bolsa kezdesedi. Mundaı kúıeý kúsh kúıeý dep atalady. Al aýyldastary, ásirese baldyzdary kúıeýmen ázildesetin daǵdy boıynsha kúsh kúıeýdi ázil-shyny aralas kúshik kúıeý atandyrǵan. «Kúshik kúıeýden qarǵybaýsyz tazy artyq» deıtin qazaq maqalynyń mazmuny kúsh kúıeýdiń qundylyqtar júıesine jatpaıtynyn ańǵartady. Al kúsh kúıeýdiń balasyn bylaıǵy jurt syrtynan jıen dep ataǵanymen, atasy ony jıen demeı, óz balasyndaı kóredi. Kúsh kúıeýdiń balasy quqyqtyq zań boıynsha jıendik jasap, «jıen quryq» almaıdy. Biraq atasy ol balany ortanshy balanyń birindeı kórip, ortanshy balaǵa beretin enshiniń mólsherindeı enshi beredi».
