Jalpy, oblys boıynsha 3420 shaqyrym jol bar. Onyń ishinde respýblıkalyq mańyzy bar joldyń uzyndyǵy 1016 shaqyrym. Byltyrǵy jyl sońynda osy sanattaǵy 204 shaqyrymdyq «Qyzylorda –Jezqazǵan» tas jolyn jóndeýge daıyndyq bastalyp, osy jyly merdiger kompanııalar jumysqa kiristi.
Sonaý sekseninshi jyldary Mańǵystaýdan ákelip tóselgen bıtýmnyń juqanasy ǵana qalǵan kúre jol týraly osyǵan deıin de talaı márte jazylǵan edi. О́ńirlik kommýnıkasııalar qyzmetiniń uıymdastyrýymen ótken kóshpeli brıfıngte Shý baǵytyna qaraǵanda, Qyzylorda men Astana arasyn 700 shaqyrymǵa jaqyndata túsetin kúre joldaǵy qaýyrt tirlikti kórýdiń sáti tústi.
Alty lot boıynsha jarııalanǵan konkýrstyń tórteýinde jeńimpaz anyqtalyp, jumysty bastap ketken. Sheteldik kompanııalar bizdiń elde jumys isteýge ruqsat beretin resimderden ótip, joldyń negizgi qabaty men aınalma jol salyp jatyr. Al olardan buryn qımyldaǵan jergilikti «Qyran» jaýapkershiligi shekteýli seriktestigi asfalt tóseýdi qolǵa alypty.
Kúre joldyń boıynda qalqaıyp turǵan kún batareıalary kózge jıi túse berdi. Buryn Qyzylordadan sál uzaǵannan Jezqazǵanǵa jetkenshe baılanystyń joqtyǵynan qulaqqa urǵan tanadaı bolatyn edik. Merdiger kompanııalar bul máseleni ýaqytsha osylaı sheship otyr eken. Mamandardyń aıtýynsha, jol qurylysy bitken soń bul mańda da jolaýshyǵa qyzmet kórsetetin servıstik keshender boı kótermek.
«Byltyr Memleket basshysynyń tapsyrmasymen bastalǵan jol qurylysy aıasynda 2022-2025 jyldar aralyǵynda «Qyzylorda-Jezqazǵan» baǵytyndaǵy avtojoldyń oblysqa qarasty 204 shaqyrymy qaıta jańǵyrtýdan ótedi. Qazir osy mańyzdy nysan oblys basshylyǵynyń tikeleı nazarynda tur. Syr men Arqany baılanystyratyn kúre jol qurylysy aımaqtyń áleýmettik-ekonomıkalyq damýyna oń áser beretini sózsiz», deıdi oblystyq jolaýshylar kóligi jáne avtomobıl joldary basqarmasy basshysynyń orynbasary Jánibek Syzdyqov.
Boz jýsandy ıen dalada óndiris oryndary qonys tebe bastapty. Qaladan 100 shaqyrym asqanda 160 tonnalyq asfalt zaýyty, taǵy bir 70 shaqyrymnan keıin osyndaı 240 tonnalyq qondyrǵy tur. Mamandardyń aıtýynsha alda taǵy bir zaýyt turǵyzylady.
«Qurylysty tehnıkalyq qadaǵalaý «DONWA Engineering Co. LTD» men «M50 Consalting Group» kompanııalaryna júktelgen. «Qazavtojol» UK» AQ jalpy úılestirý, monıtorıng jumystaryna jaýapty», deıdi «Qazavtojol» UK» AQ Qyzylorda fılıaly dırektorynyń orynbasary Ersaıyn Muzafar. – Joldyń eni – 9 metr, úsh qabattyq qalyńdyǵy 27 santımetr bolady. Jóndeý jumystary barysynda qoldanylyp jatqan qurylys materıaldary Jańaqorǵan aýdanyndaǵy Shalqııadan tasymaldanyp jatyr.
Joldyń jańǵyrýy aımaq damýyna erekshe bir serpilis beretini anyq. Avtomagıstral eldiń ońtústigi men ortalyǵyn tikeleı baılanystyryp, Syr óńirine ınvestısııa tartý aıasyn keńeıtedi, týrıstik áleýetin arttyra túsedi. Júk tasymaly kóleminiń artýy óńirde kásipkerliktiń óristeýine úlken sep bolmaq.
QYZYLORDA
