Serjant Syrym Aqshekın Kókshetaý qalasy mańynda ornalasqan 5510 áskerı bóliminiń jeke atqyshtar rotasynda ıt nusqaýshysy bolyp qyzmet atqaryp júr. Onyń mindeti – ózine bekitilgen qyzmet ıtin daıarlaý jáne qylmystyq-atqarý júıesi mekemesindegi qylmyskerlerdi izdestirý kezinde, dabyl tobymen birge qashqyndardy ustaýǵa atsalysý.
– Álemdegi eń adal haıýanat ıt dep aıtylady. Osy pikir shyndyqqa janasady ma dep oılaımyn. О́ıtkeni tórt jyldyq qyzmet tájirıbemde ıtterdiń adaldyǵyna tolyqtaı kóz jetkizdim. Ásirese, nemis ovcharkasy tuqymdastarynyń aqylyna tańǵalamyn. Olar barlyǵyn túsinedi, tek sóıleı almaıdy demeseńiz, ishki syryńdy aıtpaı uǵatyn sekildi. Keıde bolady, jumysta sharshaısyń, bálkim ashýlanyp ta qalasyń sonda ıtim barlyǵyn túsinedi. Artyq oınamaı, jattyǵýlardy jóndep oryndaıdy. Al kóńil-kúıim kóterińki bolǵan kezde onyń da kóńil-kúıi jaqsy. Jattyǵýlardy oıyn retinde ótkizemiz, – deıdi ol.
Keıipkerimiz áskerı salaǵa kezdeısoq keldi desek qateleskenimiz bolar. Ol bastapqyda ózi týyp-ósken burynǵy Torǵaı oblysynyń Arqalyq pedogogıkalyq ýnıversıtetine mýzyka pániniń muǵalimi mamandyǵyna oqýǵa túsedi. Atalǵan oqý ornyn aıaqtaǵan sátte balalyq armanyn oryndaýǵa múmkindik alady.
– Men kópbalaly otbasynda óstim. Ata-anamyz bizdi qazaqy dástúrge saı tárbıeledi. Salt-dástúrdi úıretti, dombyrada oınaýǵa baýlydy. Men birden dombyraǵa úıir boldym. Janym qalap, úırenip kettim. Kúı shertemin, anda-sanda án shyrqaımyn. Bolashaq mamandyǵymdy tańdaǵanda da ákem aıtqandaı ustaz bolýdy, onyń ishinde mýzyka páni, dombyra úıretýshi ustaz bolýdy jón kórdim. Joǵary oqý ornyn aıaqtaǵanda oblystyń Derjavın kentinde QAJ mekemelerin kúzetýge kelisimshart negizinde áskerı qyzmetshiler qajet ekenin estidim. Onyń ústine, egiz syńarym ýchaskelik polısııa qyzmetkeri. Men de baıyrǵy armanymdy oryndaý úshin áskerı qyzmetke ornalastym, – deıdi ol.
Bolmysynan ónerli keıipkerimiz úshin áskerı salada óz ornyn tabý qıyn bolmady. Sabyr, ynsap jáne izdenimpazdyq qasıet boıynan tabylǵan jumyrbasty pende úshin áskerı qyzmet – aýyr júk emes, ózińdi óziń jetildiretin orta. Syrym kóp izdendi. Mýzyka pániniń muǵalimi mamandyǵyn aıaqtasa da, áskerı qyzmetke tez boı úıretip, tez syıysyp ketti.
«Adam ónerimen emes, minezimen ortaǵa syıymdy» demekshi, serjant S.Aqshekın ónerli bola tura minez jaǵynan qarapaıym, kezdesken adammen eski dosyndaı tez til tabysyp ketedi. Sonymen qatar áskerı tártipti qatań saqtap, jarǵy talaptaryn buzbaıdy. Bul bir jaǵynan týa bitken minez bolsa, ekinshi jaǵynan ata-ana, týǵan orta bergen tárbıe. Sonymen kóp jyl boıy qaraýyl qyzmetinde jumys istegen ol qalaısha kınolog maman atandy deıtin saýaldyń týyndaýy zańdylyq. Onyń jaýaby ońaı tabylady. Derjavın kentindegi QAJ mekemesi jabylady. Jeke quram ár áskerı bólimge taratylady. Sonda Syrym Granıtnyı kentindegi atqyshtar rotasyna aýysady. Sol kezde áskerı bólim basshylyǵy oǵan ıt nusqaýshysy laýazymyn usynady. Keıipkerimiz bul belesti de baǵyndyrýǵa bel býady.
– Syrt kózge kınolog bolý ońaı kórinetin shyǵar. Shyn máninde ıtpen baılanys ornatý kerek. Áli esimde birinshi ıtti maǵan bergende kóp ýaqyt boıy til tabysa almadyq. Ol meni ıesi retinde qabyldaǵysy kelmedi. Onyń birinshi ıesi Qarakemerden ıtti úıretip, keıin maǵan beredi de ózi basqa ıt alady. Endi osy ıtpen jumys isteýim kerek boldy. Beınebir balanyń tilin tapqandaı jumys isteýiń kerek. Úıden dámdi etterdi alyp beremin. Kúnde oınatamyn. It kóngisi kelmeıdi. Birde tipti qyzyq boldy. Polıgonǵa bara jatqanda rota basshylyǵy maǵan ıtti jiberip, tekserip kór dep usynys tastady. Qyzmettik ıt maǵan áli úırenbegen, sonda da buıryqtyń aty buıryq, ıtimdi bosatyp, dalaǵa jiberdim. Qarǵabaýdan bosaǵan ıt júgirip ketti. Artyna qaramaıdy. Maǵan kelýdiń ornyna qashyp barady. Men shaqyramyn, kelmeıdi. Amal neshik artynan biraz shaqyrym qýdym. Áıteýir, ustap aldym... Sodan keıin qyzmettik ıtpen til tabysyp kettim. Oǵan da ózindik ádis kerek. Birden kınolog bola almaısyń. It nátıje kórsetý úshin birge kóp jattyǵý jasaımyz. Kúni boıy qasynda júremiz. Bar yntańdy berseń ǵana ıt senimen dos bolady, – dep aǵynan jaryldy serjant.
Bir baıqaǵanymyz, Syrym qyzmetine adal jan. О́z jumysyn qatty unatady. Kóp ýaqytty qyzmetinde ótkizedi. Onymen qosa, otbasyna da kóńil bólýdi umytpaıdy. Jan jary Araılym Bolatqyzy ekeýi Asyljan, Arýjan, Álınur, Nurıslam atty ul-qyzdardy tárbıelep otyrǵan kópbalaly, baqytty otbasy. Úlken qyzdary voleıbolmen aınalyssa, úlken uldary qazaq kúresin janyna serik etipti. Kóp aqyndar jyryna qosqan er Kóksheniń shaharynda úı alyp, tatý-tátti, baqytty-baqýatty ómir súrip jatyr.
