Sýretti túsirgen Erlan OMAR, «EQ»
Oqý-aǵartý birinshi vıse-mınıstri Sholpan Qarınovanyń aıtýynsha, osy jyly 288 myńnan astam túlek 9-synypty támamdaıdy. Olar aldaǵy ýaqytta 10-synypty jalǵastyrý nemese kolledjge túsý týraly sheshim qabyldaıdy. 11-synypty barlyq menshik túrindegi mektepter boıynsha 172 myńnan astam túlek bitiredi. Olar endi bolashaq mamandyqtaryn tańdaıdy.
«Oqý-aǵartý mınıstriniń buıryǵyna sáıkes mektepterde oqý merzimi osy jyldyń 31 mamyrynda aıaqtalady. 31 mamyrda bıylǵy oqý jylynyń sońǵy sabaǵy ótedi. Bul kúni barlyq mektep bekitilgen kestege sáıkes sabaqtaryn júrgizedi. Sabaq sońynda árbir synyp jetekshisi synyp saǵatyn ótkizedi. Synyp saǵattarynyń ssenarıılerin muǵalimder ár synyptyń jas erekshelikterin eskere otyryp, óz betinshe ázirleıdi. Synyp saǵatynyń maqsaty – oqý jylyn qorytyndylaý, 90 kúnge sozylatyn jazǵy demalys kezeńine balalardy ázirleý», dedi Sholpan Qarınova Ortalyq kommýnıkasııalar qyzmetinde ótken brıfıngte.
Dástúr boıynsha muǵalim synyp saǵatynda oqý úshin kitaptar tizimin, sondaı-aq qaraýǵa bolatyn fılmder tizimin usynady. Qaýipsizdik sharalaryn, aldyn ala josparlanyp uıymdastyrylǵan demalystyń artyqshylyqtaryn, qosymsha bilim berý uıymdaryna qatysýdyń tıimdiligin, eńbek etýdiń paıdasyn, ata-anaǵa, ata-ájelerine kómektesýdiń qajettiligin aıtady. «Synyp saǵatynda negizinen patrıotızm, otandy súıý, dostyq, tatýlyq, el tarıhyna, saıası repressııa men ashtyq qurbandarynyń esimderine qurmet tanytý taqyryptaryna basymdyq berilýi kerek», dedi birinshi vıse-mınıstr.
«Mektepter saltanatty shara ótkizý týraly sheshimdi de ózderi derbes qabyldaıdy. Oqý-aǵartý mınıstrligi sońǵy qońyraýdy ótkizýge qatysty mektep dástúrleriniń barlyǵyn qoldaıdy. Sonymen qatar mınıstrliktiń normatıvti qujattarynda mundaı sharalar buryn bolmaǵan jáne qazir de joq ekenin atap ótsem deımin. Mınıstrlik sońǵy qońyraýlardy osy jyldyń 1 maýsymynda Balalardy qorǵaý kúnine oraılastyryp, sonyń formatynda ótkizýdi usynady», dedi Sh.Qarınova.
9-synyp bitirýshiler úshin qorytyndy mektep bitirý emtıhandary 2 maýsym men 13 maýsym aralyǵynda ótedi. Al 11-synyp bitirýshiler úshin memlekettik emtıhandar 5 maýsym men 19 maýsym aralyǵynda bolady. «Jalpy orta bilim berý týraly attestatty 11-synyp túlekterine tapsyrý saltanatyn óz mektepteriniń qabyrǵasynda 20-22 maýsymda ótkizýdi usynamyz», dedi ol.
«Synyp saǵattaryn, attestat tapsyrý, sońǵy qońyraý sharalaryn ótkizgen kezde pedagogıkalyq etıkany saqtaý jáne sybaılastyq quqyqbuzýshylyqtyń aldyn alý maqsatynda ata-analardan is-sharany ótkizýge, anımatorlardy, merekelik kesh uıymdastyratyn agenttikterdi, jeke stýdııalardy jaldaýǵa, mektep ákimshiligine, pedagogterge syılyqqa aqsha jınaýǵa jol berilmeıdi», dedi Sh.Qarınova.
Tehnıkalyq jáne kásibı bilim berý uıymdary boıynsha qorytyndy attestasııa 28 maýsymǵa deıin jalǵasady. Kolledjderdi bıyl 144 myńnan astam túlek aıaqtaıdy. Dıplomdardy tapsyrý saltanatyn 28 maýsym men 1 shilde aralyǵynda ótkizý usynylyp otyr.
