Kópshilik aqynnyń aıtystaǵy ózindik máner-maqamyn áli umyta qoıǵan joq. Shyndyqty bura tartpaı, betke týra aıtatyn aqynyn aıtyssúıer qaýym árdaıym ardaq tutady.
Jaqynda Qaraǵandyda Q.Maqsutovtyń 60 jasqa tolýyna oraı «Qazaqtyń joǵyn joqtadym...» atty kezdesý keshi ótti. Jıynǵa kelgender aqynnyń ánine sýsyndap, mereıtoı ıesine sarqylmas shabyt pen qýat tilesti. Kezdesýdi Jaıyq Bekturov atyndaǵy jasóspirimder kitaphanasy uıymdastyrdy.
Kezinde aıtys ónerinde kórermen kózaıymyna aınalǵan Qýanysh Maqsutov búginde aqyn, sazger, bard. Ol bard ónerin birden-bir nasıhattaýshyǵa aınalǵan. Qaraǵandy aımaǵynda qazaqtyń ulttyq ádet-ǵuryp, dástúrine qatysty kóptegen taǵylymdy jobaǵa muryndyq bop keledi.
«Bul kezeńde halqymnyń senimin aqtaı aldym ba, endi halqyma ne beremin, menen halqym ne kútedi?» degen saýaldarǵa jaýap izdep, áli de barymdy jurtymmen bólisýge umtylamyn. Fılosoftar «О́mirdiń máni – qozǵalys» deıdi. Menińshe, ómirdiń máni – toqtap, jan-jaǵyńa zer salyp, barar baǵytyń men júrgen jolyńdy bir saraptap alýda», deıdi aqyn.
Kezdesýde oblystyq ishki saıasat basqarmasynyń basshysy Nurlan Bıkenov, Qaraǵandy qalasy ishki saıasat bóliminiń basshysy Nurjan Ilıashev, Qaraǵandy ýnıversıteti fılologııa fakýltetiniń dekany Eldos Túıte, rýhanı aǵasy, Aqtoǵaı aýdanynyń Qurmetti azamaty Tuńǵyshbaı Muqan, Aqyndar men jyrshy-termeshilerdiń halyqaralyq odaǵy atynan aqyn Aıtbaı Jumaǵul jyly lebizderin bildirdi. Qýanysh Maqsutovtyń qazaq óneri men mádenıetin damytýǵa qosqan úlesin tilge tıek etti.
Búginde aqynnyń zııatkerlik baǵyttaǵy onǵa jýyq jobasy sátti iske asty. «Zamandas-Sovremennık» gazetiniń negizinde jasaǵan «Qazaqstannyń aqparattyq ındýstrııasy» atty jobasy kezinde joǵary baǵalanǵan edi. Jastardyń rýhanı, mádenı, saıası belsendiligin arttyrýǵa arnalǵan «Balaýsa» ádebı-shyǵarmashylyq birlestigin» basqardy. Budan bólek, BUU men IýNESKO-nyń baǵdarlamalary aıasynda birqatar jobany júzege asyrdy. «Máńgilik muńnyń áýeni» bardtyq ánder jınaǵy, «Tákappar muńnyń kerbez tamshylary» jyr jınaǵy jaryq kórgen.
QARAǴANDY
