Ońtústiktegi oraq

Ońtústikte oraq qyzǵan shaq. Jalpy, darhan dalasy da, shóli men shóleıti de, qyp-qyzyl qumy da, asqaraly taýlary men qyrmyzy qyrattary da qyzyqtyratyn ózgeshe óńirińizde bıylǵy egin oraǵynyń erekshelikteri barshylyq. Kóktemińiz keshigip keldi. Jer qyzbaı qoıdy. Alǵashqy aılarda tópep jaýǵan nóserler sáýirińizdiń sońyna qarata sap tyıyldy. Mamyryńyzdan bastap tamshy tambaıtynǵa aınaldy. Esesine tynymsyz soqqan jelińiz jeti kúndik surapyl daýylǵa ulasyp, dalany da, qalany da abyrjytty. Kóp nárseni qıratyp, jazdyq bıdaı men basqa da biraz daqyldardy qurǵatyp, qýratyp tyndy. Osynyń bári Baıqońyrdan qaıta-qaıta ushyrylǵan zymyrandardyń zalaly desetinder de jetkilikti. Báribir, Ońtústik dıqan­darynyń qabaǵynda qalyń kirbiń joq. Kúzdik bıdaı men arpanyń dáni aýyńqyrap ketse de, ár gektarynan 11-12 sentnerden ónim jınalatynyna senimdi. Ysyrapqa, yrǵalyp-jyrǵalýǵa jol bermeı, tap-tuınaqtaı tirlik jasap jatyr. Shilde basynda jappaı oraq bastalǵan. Aıdyń ortasy aýa oblystaǵy 196 myń gektar masaqty daqyldyń 50 myń gektardaıynyń ónimi jınaldy. Oblystyq aýyl sharýashylyǵy basqarmasy bas­shy­larynyń málimdeýine qaraǵanda, 245 myń tonna astyq qambaǵa quıy­lady dep josparlanýda. Shilińgir shildeńizdiń alǵashqy jartysynda kúnniń qyzýy 40-43 gradýstan báseńdemedi. Dıqan­dar qaýymy eńbek qarqynyn tómen­detpedi. Qazirdiń ózinde Arys aımaǵyndaǵy egin oraǵy támam­dalýǵa taıasa, Saryaǵash-Keles beles­terinde de eginjaılardyń ba­sym bóliginde sary saban jatyr. Báı­dibek, Qazyǵurt, Ordabasy, Saı­ram aýdandarynda oraq endi qyz­sa, taýly Túlkibas pen Tóle bı aýdandarynda jańadan bastaldy deýge bolady. Ońtústik óńirinde egistik alqaptaryn ártaraptandyrý ádisi júıeli júzelenýde.  Burynǵydaı emes, qatyp qalǵan «tártipti» ýaqyt talabyna, suranystarǵa sáıkestendirý jemisti júrgizilýde. Maqtanyń kólemi bir jyldyń ózinde 9 myń gektarǵa, maıly daqyldar 8,5 myń gektarǵa azaıdy. Al, mal azyǵyndyq daqyldar byltyrǵydan 43 myń gektarǵa kóbeıtildi. Onyń ishinde jońyshqa 15 myń, arpa 17 myń, júgeri 11 myń gektarǵa arttyryldy. Oblys ákiminiń birinshi orynbasary Berik Ospanov bastaǵan basshylar men mamandar Qazy­ǵurt taýynyń baýraıyndaǵy egin­jaılardy egjeı-tegjeıli aralap kórdi. «Ártaraptandyrýdyń nátıjesi kórinip tur, oblys boıynsha mal azyǵyn daıyndaý 70 paıyzǵa jaqyndady, – deıdi Berik Serikuly. – Qazyǵurt aýdanynda meje 90 paıyzǵa jetip qaldy. Astyq túsimi qýańshylyqqa baılanysty biraz tómendegenmen, mal azyǵynan utylmaımyz». Marhabat BAIǴUT, «Egemen Qazaqstan». Ońtústik Qazaqstan oblysy.