Aryz-shaǵymdar qaraldy

Prokýratýra organdarynyń qadaǵalaý júıesiniń basty basym baǵyttarynyń biri – jeke jáne zańdy tulǵalardyń aryz-shaǵymdaryn tolyqqandy jáne ýaqytyly qaraý bolyp tabylady. Aryzdanýshynyń shaǵymdaryn jáne dálelderin muqııat tekserýge, buzylǵan quqyqtardy qalpyna keltirý jónindegi sharalarǵa basty nazar aýdarylady. Aǵymdaǵy jyldyń 5 aıy ishinde Bas prokýratýranyń laýazymdy tulǵalary ótkizgen jeke qabyldaý barysynda 139 shaǵym tústi. Olardyń ishinde 27 aryz qanaǵattandyrylyp, 78-i keri qaıtaryldy, 15-i boıynsha quqyqtyq túsinikter berildi. Bas Prokýrordyń jeke qabyldaýyna túsken 47 shaǵymnyń kóbisi sot aktileriniń zańdylyǵymen kelispeýmen baılanys­ty. Shaǵymdanýshylar jedel izdestirý orga­n­darynyń, sondaı-aq áleýmettik-ekonomıkalyq salanyń laýazymdy tulǵalarynyń áre­ket­terine narazylyq bildiredi. Olardyń dá­lelderin zerdeleý nátıjesinde 8 aryz qanaǵattandyryldy. Mysaly, «Elim-Aı» turǵyn-úı ke­she­ni­niń ókili Ch.Valıevtiń aryzy qaralyp, qorytyndysy boıynsha alaıaqtyqpen aı­na­lysqan tulǵalarǵa qatysty toqtatylǵan qyl­mystyq istiń qaýlysynyń kúshin Bas prokýratýra joıyp, Almaty qalasynyń prokýroryna qosymsha tergeý amaldaryn júrgizýdi tapsyrdy. Sonymen qatar, N.Qorǵambekovanyń ótinishi qanaǵattandyryldy ıaǵnı, aryzdanýshy men «Qazaq kóz aýrýlary ǵylymı-zertteý ınstıtýty» AQ-tyń arasyndaǵy eńbek daýynyń sot aktisi boıynsha Joǵarǵy Sotqa qadaǵalaý narazylyǵy engizildi. «Onlaın» beınekonferensııalyq júıesin qoldaný arqyly prokýratýra basshylarynyń turǵyndardy qabyldaýy qolaıly jáne tıimdi tásilge aınalyp otyr. Bul norma Bas prokýror bekitken azamattardy qabyldaý erejesinde belgilengen. Jańa format, eń aldymen, ýaqytty jáne materıaldyq qarajatty únemdeý, turǵyndardyń turǵylyqty jerinen alshaqtamaı ózderiniń ótinishterin kez kelgen deńgeıdegi prokýratýra basshylaryna baıandaý jaǵynan yńǵaıly jáne paıdaly. Sondyqtan da qazirgi tańda adamdar prokýrorlarmen osy formatta habarlasýǵa yntaly. Bas prokýratýra basshylary beınekonferensııa júıesi arqyly jyl basynan beri 27 adamdy qabyldady, dep habarlady Bas prokýratýranyń baspasóz qyzmeti.