2020 jyldyń tamyz aıynda Dımash Qudaıbergenniń polshalyq jankúıerleri táýligine 24 saǵat jáne aptasyna 7 kún boıy Dımashtyń ánderin, Qazaqstannyń mádenıeti týraly baǵdarlamalardy usynatyn onlaın radıony iske qosty. «Dımash» radıosy – zańdy túrde tirkelgen habar taratý stansasy. Onyń Varshavada onlaın habar taratý jáne baǵdarlamalar men podkastardy shyǵarýǵa arnalǵan jeke stýdııasy bar. Radıodan Polshada turatyn qazaqtarmen, Qazaqstanda turatyn polıaktarmen jáne Dımashtyń jankúıerlerimen qyzyqty suhbattar beriledi. Keıbir baǵdarlamalar eki tilde – polıak jáne qazaq tilderinde jazylǵan.
Sońǵy bir jylda «Dımash» radıosy óz efırinde qazaq tiliniń onlaın kýrsyn júrgize bastady. Ondaǵy qazaq tili sabaqtaryn álemniń túkpir-túkpirinen kelgen tyńdarmandar paıdalana alady. Ol úshin radiodimash.pl saıtyndaǵy radıony qossańyz bolǵany. Jańa sabaqtar ár seısenbi saıyn CET 20:00-de kórsetiledi jáne translıasııadan keıin podkast retinde qoljetimdi. Bul materıaldy ózderine yńǵaıly ýaqytta tyńdaýyna múmkindik beredi. Sabaqty almatylyq jas ınjener ári Dımash shyǵarmashylyǵynyń jankúıeri Beglan Sharynbaı júrgizedi.
«Dımash» radıosynyń jetekshisi Tereza Kakol Polsha men Qazaqstandy 4 myń kılometr bólip turǵanyn, biraq ǵalamtor ǵasyrynda bul Dımashqa, Dımash arqyly uly qazaq halqyna degen mahabbatqa kedergi keltire almaıtynyn aıtty. «Biz Beglan myrzamen onlaın jumys isteımiz, beınekonferensııalar kezinde barlyq taqyrypty talqylaımyz jáne materıaldardy qashyqtan jazyp alamyz», deıdi Tereza Kakol.
«Dımash» radıosyndaǵy qazaq tili sabaǵynyń alǵashqy nátıjeleri jaman emes. «DiVoices» horynyń polshalyq jankúıerleri Dımashtyń «Mahabbat ber maǵan» ániniń maǵynasyn túpnusqada aıtty. Hor soprano, alt, tenor jáne basta shyrqalady. T.Kakoldyń aıtýynsha, Dımash ánderi túńǵysh ret hormen Polshada aıtyldy. Ánniń aranjırovkasyn tanymal pıanıst Olga Popova «DiVoices» úshin jazǵan. Aıtylýy qıyn qazaq sózderin meńgerý maqsatynda hor músheleri B.Sharynbaımen jelide kezdesip, án mátininiń túpnusqasyn zerdelep, júrek súzgisinen ótkizip jetkizdi. «Júrekten shyqqan án júrekke jetedi. Talant pen tańǵajaıyp daýys álemge ortaq. Qazir bul jobaǵa Eýropalyq odaqtyń ózge múshe memleketterindegi tyńdarmandar da yqylas tanyta bastady», deıdi T.Kakol.
«DiVoices» horyndaǵy ánshilerdiń basym kópshiligi buryn án aıtpaǵan. Dımashtyń daýysynyń tylsym qudireti olardy sahnaǵa alyp kelgen. Az ǵana ýaqyt ishinde qazaq tilin úırenip qana qoımaı, vokal óneriniń qyr-syryn meńgerýge talpynyp júr. T.Kakoldyń aıtýynsha, radıodaǵy kásibı mamandar hor múshelerine yrǵaqty, dıksııany jáne daýys shyǵarýdy jattyqtyrýmen aınalysady. Kómeıdiń qaltarysynda jasyrynyp jatqan áýezdi úndi arshyp alyp, jaryqqa shyǵaryp, durys qalyptasýyna, daýystyń durys qoıylýyna septigin tıgizip júr.
