Bul bastamanyń ereksheligi sol, aýyldaǵylar densaýlyǵyn teksertý úshin aýdan, oblys ortalyǵyna aǵylmaıdy. Kerisinshe, jyljymaly medısınalyq keshen aýyldarǵa barady. Quny 156 mln teńge turatyn medısınalyq keshen – avtobýstyń ishinde densaýlyqty súzgiden ótkizýge qajettiniń bári bar: dárigerlerdiń keńesi, mamandandyrylǵan medısınalyq kómek kórsetý, dıagnostıkalyq jáne skrıngtik zertteýler júrgizýge múmkindik beretin birneshe kabınet. Hırýrg, gınekolog, oftalmolog, kardıolog, pedıatr, otolorıngolog, dantıst, jalpy tájirıbelik dárigerler men EKG meıirbıkesi, rentgen men ÝDZ laborantyna sheıin bar keshen osy zamanǵy medısınalyq qural-jabdyqtarmen jabdyqtalǵan. Bir emes, birneshe mamanǵa birden qaralyp, tolyqqandy tekseristen ótýge múmkindik bar.
– Bul keshenniń qyzmetin aýyldaǵy kez kelgen turǵyn paıdalana alady. Medısınalyq saqtandyrýy bar ma, joq pa, buǵan qaramaıdy, bári de tegin. Áleýmettik medısınalyq saqtandyrý qorynyń Ulytaý oblystyq fılıalynyń Jańaarqa aýdandyq kópbeıindi ortalyq aýrýhanasymen jasaǵan kelisimsharty negizinde osy sharaǵa 40 mln-nan asa qarajat qarastyrylǵan. Bul jumys qyrkúıek aıyna sheıin jalǵasady, deıdi «Áleýmettik medısınalyq saqtandyrý qory» KeAQ Ulytaý oblysy boıynsha fılıalynyń dırektory A.Berdibekov.
Jan-jaqty oılastyra bilse, kez kelgen tyǵyryqtan shyǵatyn jol tabýǵa bolady eken. Dáriger toly avtobýstyń qyzmeti sony kórsetip otyr.
Ulytaý oblysy
