Rapýnsel ertegisiniń uzyn shashty keıipkeriniń esimimen atalǵan «shash jutý» sındromy – óte sırek kezdesetin syrqat. Bul isik asqazan-ishek jolynda qorytylmaıtyn, sińirilmeıtin shashtyń úlken kólemde jınalýynan paıda bolyp, ishki aǵzalardyń kidirissiz jumysyna kedergisin keltiredi. Áleýmettik medısınalyq saqtandyrý qorynyń Astana qalasy boıynsha fılıaly bergen málimetke súıensek, osynaý dertke dýshar bolǵan 15 jastaǵy bala Atyraý oblysynan shıpa izdep kelipti.
«Bul aýrý óte sırek kezdesedi. Asqazanda jınalǵan shashtyń kóp mólsheri trıhobezoardyń nemese «shashty isiktiń» paıda bolýyna ákelip soǵady, sosyn asqazandy birte-birte jaýyp, bitep tastaıdy. Mundaı isik «uzyn quıryqty» asqazannyń pishinine keledi, ash ishekke deıin jetedi. Ǵylymı málimetter boıynsha, Rapýnsel sındromy bar naýqastardyń 70 paıyzy – 20 jasqa tolmaǵan áıel adamdar», dep túsindirdi №2 kópsalaly qalalyq balalar aýrýhanasynyń josparly hırýrgııa bóliminiń meńgerýshisi Azamat Orazalınov.
Dárigerdiń aıtýynsha, uldarǵa qaraǵanda qyzdar Rapýnsel sındromyna jıi ushyraıdy. Áıelderdiń shashtary ádette er adamdarǵa qaraǵanda uzyn, sondyqtan asqazannyń shyryshty qabatynda qalyp qoıý yqtımaldyǵy joǵary. Bala shashty jutqan kezde isik kólemi ulǵaıady jáne bul ishki aǵzalardy zaqymdaıdy.
«Pasıentterde trıhofagııa belgileriniń paıda bolýyn, ıaǵnı olardyń nege shash jeıtinin túsindiretin kóptegen teorııa bar. Mysaly, stresske qarsy qural sekildi únemi durys tamaqtanbaý nemese daǵdylardyń áserinen týyndaıtyn balalyq negatıvızm. Trıhofagııa jáne pıkasızm, ıaǵnı tábettiń buzylýy jáne jeýge jaramsyz zattardy jegisi keletin, baqylaýǵa kónbeıtin bul ádet aǵzasynda temir jetispeıtin adamdarda kezdesedi. Rapýnsel sındromynyń keıbir ǵylymı sıpatynda pasıent quramynda temir bar preparattardy qabyldaǵannan nemese selıakııa syrqatynan emdelgennen keıin shashty julýdy jáne jeýdi qoıady. Bul aýrýdyń yqtımal sebepterin joqqa shyǵarǵan kezde mindetti túrde psıhologtyń keshendi kómegi qajet. О́kinishke qaraı, kóp jaǵdaıda hırýrgııalyq ádis «shashty isik» máselesin birden sheshetin jáne asqazan-ishek joldaryn qalpyna keltiretin eń tıimdi ádisi bolyp qala beredi. Balaǵa bizdiń aýrýhanada josparlanǵan hırýrgııa bóliminde laparotomııa, gastrotomııa, asqazannyń trıhobezoarasyn alyp tastaý operasııasy jasaldy. Operasııany Astana qalasynyń shtattan tys bas balalar hırýrgi Rınat Báıgereev jasady. Qazirgi ýaqytta bala dárigerler baqylaýynda», dedi A.Orazalınov.
Aýrýhanaǵa túsken balanyń ata-anasy aldymen óz emhanasyna júginip, onda fıbrogastrodýodenoskopııa (FGDS) arqyly tekserý júrgizgen eken.
«Biz Atyraý oblysynan keldik. Balamyz – 15 jasta. Qazirgi ýaqytta oqý jyly aıaqtalǵansha Astanada turyp jatyrmyz. №2 emhanada tirkeýdemiz. Bala mezgil-mezgil ishi aýyryp, tamaq ishkennen keıin qusatyn. Tekserý kezinde asqazanynda trıhobezoar anyqtaldy. Sodan №2 kópsalaly qalalyq balalar aýrýhanasyna joldama berip, portalǵa qoıdy. MÁMS júıesi arqyly qysqa merzimde aýrýhanaǵa jatqyzyp, operasııa jasady. Bala qazir ózin jaqsy sezinedi. Sol úshin kómek qolyn sozǵan altyn qoldy abzal jandardyń bárine rızashylyǵymyzdy bildiremiz», deıdi ájesi Sveta.
