«Energetıka salasyndaǵy, onyń ishinde, munaı-gaz sektoryndaǵy qarym-qatynasty damytýǵa mol múmkindik bar. Biz munaı eksportyn kóbeıtýge múddelimiz. Sol úshin «Qazaqstan – Qytaı» munaı qubyrynyń tasymal múmkindigin arttyrýdy josparlap otyrmyz. Kún tártibinde qoldanystaǵy «Atyraý – Keńqııaq», «Keńqııaq – Qumkól» munaı qubyrlarynyń ótkizý múmkindigin arttyrý máselesi tur. Qazir munaı ónimderin tutyný kólemi udaıy ósip keledi. Sondyqtan, Shymkent munaı óńdeý zaýytynan shyǵatyn ónim kólemin jylyna 6-dan 12 mıllıon tonnaǵa deıin kóbeıtýdi kózdep otyrmyz», dedi Prezıdent.
Sondaı-aq ol gaz óńdeý qýatyn arttyrý jáne gaz tasymaldaý júıesin jetildirý Qazaqstan úshin basym baǵyt ekenin sóz etti.
«Biz úshin «Beıneý – Bozoı – Shymkent» magıstraldi gaz qubyrynyń ekinshi tarmaǵyn salý óte mańyzdy. Qashaǵan kenishinde jylyna 4 mıllıard tekshe metr gaz óńdeıtin zaýyt qurylysyna da basa mán beremiz. Qytaılyq dostarymyz aımaqtaǵy osy mańyzdy jobalarǵa qoldaý kórsetýdi jalǵastyrady dep senemiz», dedi Q.Toqaev.
