«Aımaqtyń qaýipsizdigin jáne turaqtylyǵyn qamtamasyz etý – basty mindettiń biri. Qytaıdyń bul mindetti oryndaýǵa zor úles qosyp otyrǵanyn Qazaqstan joǵary baǵalaıdy. Qytaı Halyq Respýblıkasy aımaqtaǵy qaýipsizdik pen turaqtylyqty qamtamasyz etý isinde mańyzdy ról atqarady. Barlyq eldiń aýmaqtyq tutastyǵyn jáne egemendigin saqtaýǵa qatysty Beıjińniń ustanymy esh ózgergen emes», dedi Q.Toqaev.
Sondaı-aq ol Qytaıdyń ózge memleketterdiń ishki isine aralaspaý qaǵıdatynan aınymaı kele jatqanyn atap ótti.
«Qytaıdyń osy berik ustanymy erekshe qurmetke laıyq. Qazaqstan da Qytaıdyń Ortalyq Azııaǵa qatysty júrgizip otyrǵan beıbit syrtqy saıasatyn quptaıdy. Biz Beıjińniń turaqty damýǵa jáne qaýipsizdikti qamtamasyz etýge baǵyttalǵan bastamalaryn qoldaımyz. Ortalyq Azııanyń qashanda yntymaǵy jarasqan, jasampaz aımaq retinde damyǵanyn qalaımyz. Osy óńirdi geosaıası teketires alańyna aınaldyrýǵa qarsymyz», dedi Qasym-Jomart Kemeluly.
