19 mamyr kúni saǵat 11:40 shamasynda Atyraý qalasy Áıteke bı kóshesi mekenjaıynda ornalasqan 15 qabatty úıdiń dáliziniń qosalqy bólmesinde órt shyqqan. Jalyn sharpyǵan úıge Atyraý qalalyq polısııa basqarmasynyń aǵa ýchaskelik polısııa ınspektorlary Samalbek Begalıev pen Asylanbek Jolaı oqıǵa ornyna dereý kelip, órttiń úshinshi qabattan shyǵyp jatqanyn baıqaǵan. Tártip saqshylary tótenshe jaǵdaı qyzmetkerlerimen birlesip, adam ómirine tóngen qaýipti birge aýyzdyqtaǵan.
Qyzmetkerlerdiń jedel áreketi nátıjesinde órtke oranǵan úıden eki zeınetker, 10 jasóspirim (onyń ishinde tórt náreste bar) men 13 páter turǵyny qaýipsiz jerge shyǵarylyp, nátıjesinde 25 adam evakýasııalandy.
«Adam ómirine qaýip tóngen ýaqytta oılanýǵa ýaqyt joq. Syn saǵatta dereý áreket etpesek, kesh qalýymyz múmkin edi. Oqıǵa ornyna kelgen kezde órttiń úshinshi qabattan shyqqanyn baıqap, tótenshe jaǵdaı qyzmetkerlerimen dereý áreket etip, úı ishinde qalǵan 25 turǵyndy syrtqa shyǵardyq. Shuǵyl sheshim qabyldaýdyń nátıjesinde jaraqat alǵan adam bolmady», deıdi órtti aýyzdyqtaǵan qos polıseı Samalbek pen Asylanbek.
