Balalar munda ushaqtar men sý kemeleriniń, áskerı tehnıkalardyń, avtokólikterdiń, elektronıkanyń túrli úlgilerin jasap, robottehnıkamen shuǵyldanady. Oblys ortalyǵyndaǵy orta mektepterden búginde 500-den astam bala turaqty baryp júr. Er balalar óz qoldarymen ushaqtar men áskerı tehnıkalardyń túr-túrin jasap, olardyń keıbirin áýede ushyrýǵa beıimdeıdi. Sáýlet óneriniń qyr-syryn meńgerip, kádimgi karton men qaǵazdan túrli tehnıkalardyń úlgisin pishedi. Al qyzdar kóbine bıser toqyp, kádesyılar, áshekeı buıymdaryn jáne jumsaq oıynshyqtardy daıyndaıdy. Mundaǵy 21 úıirmeden balalar úzilip kórgen emes. Qysqasy, tehnıkalyq mektep jasóspirimderge súıikti ispen keńinen shuǵyldanýǵa, tehnıkalyq jáne qoldanbaly ónerdiń uńǵyl-shuńǵylyn erte bastan ıgerýge múmkindik berip keledi.
Mektep dırektory Aleksandr Zozýlıanyń aıtýynsha, tehnıkalyq jáne kórkem-qoldanbaly shyǵarmashylyqqa úıir balalardyń sany jyl sanap ósip keledi.
– Jarty ǵasyrdan astam ýaqyt ishinde birneshe myń oqýshy tehnıkalyq shyǵarmashylyqtaryn osy jerde jetildirip, kóbi mektep bitirgen soń tehnıkalyq mamandyqtardy tańdaıtynyn baıqap júrmiz. Avıamodeldeý úıirmesinde ushý apparattarynyń ondaǵan biregeı úlgisi bar. Olardyń keıbiri kádimgideı kókke kóterilip, ushady. Balalardy kóbine áskerı tehnıkalar qyzyqtyrady. Túrli brondy tehnıkalar men tankilerdiń úlgilerin daıyndap, kórmelerge qatysamyz. Munda Ekinshi dúnıejúzilik soǵys jyldarynda qoldanysta bolǵan «IS» ushaǵynyń sırek kezdesetin túrin, nemis ushaqtarynyń kóshirmesin kóre alasyzdar. Sý kemeleriniń túr-túri bar. Osynyń barlyǵy – shákirtterimizdiń shyǵarmashylyǵynan týǵan dúnıeler. Biz tek baǵyt berip otyramyz, qalǵanyn ózderi jasaıdy, – dep túsindirdi mektepte uzaq jyldan beri eńbek etetin A.Zozýlıa.
Bir qyzyǵy, jazǵy demalysta jáne toqsan aralyq demalys mezgilderinde kelýshi balalar tipti jıilep ketetin kórinedi. Jyl boıy qyzmet kórsetetindikten, balalar bos ýaqytyn osynda ótkizýge beıim. Keıbir ata-analar balalaryn gadjet pen kompıýterden ajyratý úshin osynda jetektep keledi eken. Oqýshylar onlaın oıyndardan kórgen tehnıkalyq úlgilerdi pishindeýge qumartyp turady. Bul turǵyda robottehnıka úıirmesiniń mańyzy zor. Jańadan robottar men mashınalardyń úlgilerin qurastyrý, olarǵa baǵdarlama jazý aqparattyq tehnologııadan az-maz habary bar balalar úshin óte qyzyqty deıdi mundaǵy ustazdar. Robottehnıka úıirmesi 6 jastan bastap qabyldaıdy. Oqytýshy Roman Ladın jas boıynsha shekteýler joq ekenin aıtty. «16 jasqa tolǵan bozbalalar da úırenip júr. Oqýshylardy jas mólsheri boıynsha toptarǵa bólmeımiz, olarǵa deńgeıine qaraı tapsyrmalardy bólip beremiz. Tipti balalardyń ádettegi mekteptegi sabaqtaryn eskerip, kesteni yńǵaıly etip qurýǵa tyrysamyz. Oqýshylar aptanyń jeti kúninde de kele beredi», deıdi ol.
Negizi pavlodarlyq tehnıkalyq mektepti elimiz boıynsha biregeı dep ataýǵa turarlyq. Sebebi ondaǵy keıbir úıirmelerdiń respýblıkada balamasy joq. Máselen, áskerı tehnıka úıirmesin alaıyq. Áskerı tehnıkalardyń úlgilerin qurastyrý, jańa túrlerin jetildirý oqýshylardy únemi shyǵarmashylyq izdeniske jeteleıdi. Bul úıirmege tek uldar ǵana emes, qyz balalar da áýes. Búginde áskerı tehnıka úıirmesine 60-taı bala turaqty qatysady eken. Oqýshylar túrli aspaptarmen jáne metalmen jumys isteýdi úırenedi. Kóptegen balalar qoldaryna qalaıymen dánekerleý aspabyn alǵash ret alyp, metall qıyndylarynan qııaly jetken buıymdardy qurastyrady.
Al avıamodeldeý úıirmesine sonaý 1981 jyldan beri Sergeı Sos jetekshilik etip keledi. Ol avıamodeldeý sporty boıynsha elimizdiń ulttyq tóreshisi, sport sheberi. Munda oqýshylardy tek 4-synyptan bastap qabyldaıtynyn jetkizdi. Sebebi balanyń zeıini tolysyp, denesiniń fızıkalyq turǵydan damýy osy kezeńde joǵary bolady eken. «Mektepte úıretpeıtin mashyqtardy sińiremiz. Qazirgi kúni orta mektepterdegi tehnologııa sabaǵynda ne úıretetini bizge jumbaq. О́kinishke qaraı, bizdiń uıymnyń bosaǵasyn attaıtyn balalardyń arasynda kádimgi syzǵyshtyń ózin durys paıdalana almaıtyndar kezdesedi. Ondaı jetkinshekter úshin kúrdeli quraldarmen jumys isteý birtindep úıretiledi», dep atap ótti.
Jaqynda ustazdyń shákirtteri avıamodeldeý sporty boıynsha ótken el chempıonatynda ekinshi orynnan kórindi. Bul jarysqa О́zbekstan, Qyrǵyzstan jáne Reseı memleketterinen da jas konstrýktorlar qatysqan.
A.Zozýlıa mektepti támamdaıtyn balalardyń kóbi ınjenerlik-konstrýktorlyq bilim negizderin meńgerip shyǵatynyn jetkizdi. Tehnıka salasynda belgili bilim ıgergen mundaı oqýshylar keıin ınstıtýtqa túskende, óndiriste jumys istegende ózderiniń bıik deńgeılerin dáleldeıdi. Úıirmeni bitirip shyqqan balalardyń mektepten soń ınjenerlik-tehnıkalyq mamandyqtardy tańdaıtyny da sodan.
PAVLODAR
