Kenshi, metallýrgterdiń talap-tilegi negizinde daıyndalǵan baǵdarlama boıynsha bıyl 75 adam páter alady. Jaqynda osy baǵdarlamaǵa qatysyp, jeńildetilgen nesıe buıyrǵan turǵyndarǵa sertıfıkattar berildi. Sertıfıkattardy oblys ákimi Ermaǵanbet Bólekpaev pen «Otbasy banki» basqarma tóraǵasy Lázzat Ibragımova tabys etti.
«Kenshiler men metallýrgterge jeńildetilgen ıpotekalyq nesıe berý ekinshi jyl júzege asyp otyr. Baǵdarlamaǵa qatysýshylar tizimin «ArselorMıttal Temirtaý» AQ kómir jáne bolat departamentteriniń kásipodaǵy jasaqtady. «Otbasy bank» nesıe alýǵa nıet etken alǵashqylardyń ótinishin maquldady. Bıyl 75 otbasy páterge qol jetkizedi. «Otbasy bankpen» birlesken jumys jalǵasyn tabady. Sondaı-aq oblysta jas mamandarǵa arnalǵan ıpotekalyq baǵdarlamany atap ótý qajet. Baǵdarlamanyń búginde geografııalyq aýqymy keńeıdi. Osy jyly baǵdarlamaǵa Balqash, Saran, Temirtaý qalalary da qosylady. Ári qaraı monoqalalardaǵy jas mamandar men jumysshy jastarǵa ıpoteka berýdi jolǵa qoıamyz», dedi E.Bólekpaev.
«Otbasy bank» AQ basqarma tóraǵasy Lázzat Ibragımova baǵdarlamaǵa qatysýshylardy irikteýdegi kásipodaqtardyń jumysyna rızashylyǵyn bildirdi. Sonymen birge «ArselorMıttal Temirtaý» kompanııasynyń alda baǵdarlamaǵa qatysatyndyǵyna úmitti ekenin jetkizdi.
«Qaraǵandy oblysy degende kóz aldymyzǵa kenshi men metallýrgterdiń beınesi keletini ras. Bular – eren eńbek adamdary. Zor qurmetke laıyq. Qandaı kenshi-metallýrgtiń baspanaǵa muqtaj ekenine irikteý jasaǵan kásipodaqtarǵa alǵys aıtqym keledi. Eńbek adamynyń barlyq jaǵdaıyn kásipodaqtardan artyq biletin eshkim joq. Qaraǵandy metallýrgııa kombınatynyń basshylyǵy da baǵdarlamaǵa qatysyp, qosymsha resýrstar bóledi degen úmitimiz bar», dedi L.Ibragımova.
Nesıe 15 jylǵa rásimdeledi. Jyldyq mólsherlemesi 5 paıyz. Bıyl qaryzdyń eń joǵary somasy 20 mln teńge. Páterdi Qaraǵandy, Saran, Abaı, Shahtınsk, Temirtaýda bastapqy jáne qaıtalama naryqtan satyp alýǵa bolady.
Shahtada 8 jyldan beri jumys isteıtin Artem Vojjov baǵdarlamanyń tıimdiligin, áli de jelisin úzbeı jalǵasýy qajettigin aıtady. Artem Shahtınsk qalasynan úshbólmeli páter alypty. Otbasynda eki balasy bar.
«Tentek» shahtasynda shamamen 8 jyldan beri jumys istep kelemin. Buǵan deıin ata-anammen birge turǵan edik. Endi baǵdarlama arqyly baspanaly boldyq. Shahtınsk qalasynda úsh bólmeli páter tabyldy. Baǵdarlama óte tıimdi. Mundaı baǵdarlamalardyń bolashaq úshin jalǵasy bolýy kerek», deıdi A.Vojjov.
Byltyr kenshiler men metallýrgterdiń baspana alýyna 1,7 mlrd teńge bólinip, 134 otbasy páterli boldy. Bıylǵy qarjy kólemi 1 mlrd 500 mln teńge.
Qaraǵandy oblysy
