Sýretti túsirgen Erlan OMAR, «EQ»
Mazmundy otyrysty elimizdiń Germanııadaǵy Tótenshe jáne ókiletti elshisi Nurlan Onjanov jáne German ekonomıkasy Shyǵys komıtetiniń atqarýshy dırektory Mıhael Harms júrgizdi. Jıynda alǵashqy bolyp sóz alǵan Syrtqy ister mınıstriniń orynbasary Roman Vasılenko elimizdi odan ári ındýstrııalandyrý jáne ónerkásiptik áleýetin arttyrý úshin kásibı tehnıkalyq kadrlar bazasyn ulǵaıtý mańyzdy ekenin atap ótti.
«Bizdiń el nemistiń baı tájirıbesine qyzyǵýshylyq tanytyp otyr. Kásibı ınjenerlik-tehnıkalyq kadrlardy daıarlaýdyń álemdegi ozyq úlgisi kim-kimdi bolsyn qyzyqtyrary daýsyz. Sondaı-aq joǵary nemis standartyna sáıkes daıarlanǵan bilikti tehnıkalyq mamandardyń bolýy eki el arasyndaǵy birlesken jobalardy sátti júzege asyrýda mańyzdy ról atqarady», dedi ol.
German ekonomıkasy Shyǵys komıteti prezıdıýmynyń múshesi Manfred Grýndke óz baıandamasynda eki memleket arasyndaǵy saýda-ekonomıkalyq yntymaqtastyq serpininiń belsendi ósýi men nemis kásipkerleriniń bizdiń naryqqa qatysýǵa qyzyǵýshylyq tanytyp otyrǵanyn aıtty.
Jıynda negizi baıandamany Ǵylym jáne joǵary bilim vıse-mınıstri Qýanysh Erǵalıev jasady. Ol elimizdegi joǵary tehnıkalyq bilimdi damytý josparlaryna toqtaldy.
«Qazir elimizde sheteldik jetekshi tehnıkalyq joǵary oqý oryndarynyń fılıaldaryn ashý kózdelip otyr. Máselen, Aqtaýdaǵy Sh.Esenov atyndaǵy Kaspıı tehnologııalar jáne ınjınırıng ýnıversıteti negizinde Qazaqstan-German ınjınırıng ınstıtýtyn jáne D.Serikbaev atyndaǵy Shyǵys Qazaqstan tehnıkalyq ýnıversıteti negizinde Taý-ken ónerkásibindegi qazaq-german ǵylym jáne tehnologııa ınstıtýtyn ashý josparymyzda bar. Sondaı-aq otandyq zertteýshilerdiń shetelde taǵylymdamadan ótýi boıynsha «500 ǵalym» baǵdarlamasy júzege asyp jatyr», dedi vıse-mınıstr.
Sonymen qatar «Bolashaq» baǵdarlamasynyń aıasynda 500-ge jýyq otandasymyz Germanııada oqyp, olardyń teń jartysy tehnıkalyq jáne ınjenerlik baǵytta bilim alǵan. Q.Erǵalıev basqalarmen salystyrǵanda bizdiń azamattardyń nemis elinde bilim alýy jaǵynan jetinshi orynda turǵanyn aıtty.
Nemis eli tarapynan baıandama jasaǵan Germanııa Syrtqy ister mınıstrliginiń ǵylym, bilim jáne zertteýler salasyndaǵy syrtqy saıasat jónindegi ýákili Vıto Chechere ekijaqty bilim jáne ǵylym salasyndaǵy yntymaqtastyqtyń negizgi baǵyty men olardy odan ári keńeıtý perspektıvalary týraly áńgimeledi.
Nemis dıplomatynyń aıtýynsha, Gıote ınstıtýtynyń, Germanııanyń akademııalyq stýdentter almasý qyzmetiniń (DAAD), «Mektepter: bolashaq seriktesteri» (PASCH-schools) bastamasynyń, Qazaq-German ýnıversıtetiniń, Sheteldegi etnostyq nemisterdi qoldaý qorynyń (SVmDA) qyzmetin qoldaıdy.
