Bul mórdi mýzeıge Mustafa Shoqaı urpaqtarynyń biri, jýrnalıst Gúlbarshyn Zaıyrova tapsyrdy. Onyń aıtýynsha, Alash ardaqtysy 1939 jylǵa deıin qujattarynda óz qolymen osy mórin basqan. Munda onyń aty-jóni men turǵylyqty mekenjaıy fransýz tilinde jazylǵan.
«Bul mórdi negizi Mustafa atamnyń aıaýly jary Marııa Shoqaı ómirden óter aldynda óziniń rýhanı balasy Álim Almatqa tapsyryp ketken. Sonymen qatar Marııa ájemiz ol kisige eriniń jazý mashınkasyn,otbasylyq albomyn, hattary men qujattaryn amanat etip beripti. Keıin Álim atamyz bul zattardy qartaıǵan shaǵynda belgili shoqaıtanýshy ǵalym Baqyt Sadyqovaǵa óz qolymen ótkizgen. Biz osy mýzeı ashylǵanda Baqyt apamyzdy arnaıy izdep baryp, biraz jyl kóziniń qarashyǵyndaı saqtaǵan atamnyń jazý mashınkasyn alyp, osynda ákep qoıdyq. Endi mórin ákelip otyrmyz. Baqyt Sadyqovanyń shoqaıtanýdaǵy eńbegi óte zor. Ol kisige alǵysymyz sheksiz», deıdi G.Zaıyrova.
Odan keıin sóz alǵan professor Ábdijálel Bákir túrki álemine ortaq tulǵanyń qaıratkerligi týraly parasatty oı qozǵady. Al osy is-sharaǵa sonaý Túrkııadan kelip qatysqan shoqaıtanýshy Ábdiýaqap Qara Mustafa Shoqaıdyń ult táýelsizdigi tarıhynda orny bólek tulǵa ekenin aıtty.
«Biz búgin táýelsizdigimizge táýbe deıtin bolsaq, ol – Mustafa sekildi Alash arystarynyń azattyq jolyndaǵy kúresiniń jeńisi. Otarshyl elder Mustafa Shoqaıdan qatty qoryqty. Shyndyǵynda, Mustafany aqtaý qajet emes. Onyń eshqandaı qylmysy joq. Tek uly tulǵa týraly tarıhı ádilettilikti ornatý kerek. Búgingi is-shara – sonyń biri kórinisi. Júz jyldan keıin kórnekti qaıratkerdiń móri elorda tórindegi óziniń atyndaǵy mekteptiń murajaıyna tapsyrylyp otyrǵany – ádilettiliktiń ornaǵany dep bilemiz», – dedi ǵalym.
Sondaı-aq is-shara aıasynda Mustafa Shoqaı atyndaǵy mektep oqýshylary ázirlegen alyp tulǵa ómirinen bir úzik syr shertetin ádebı-kompozısııa kórsetilip, «Men qashanda jan-tánimmen senimen birgemin» atty kórme usynyldy.
