Pýsan turǵyndary 20-dan astam eldiń ókilderi qatysqan is-sharaǵa erekshe qyzyǵýshylyq tanytty. Uıymdastyrýshylar jaǵy Qazaqstanǵa qurmet bildirip, tórinen oryn berdi. Jergilikti turǵyndar qazaqtyń kádesyılary men kitaptaryn satyp alyp, ulttyq taǵamdarymyzdan dám tatty. Jármeńkede Qazaqstan delegasııasy 5 shatyrǵa ornalasyp, Koreıadaǵy jalǵyz qazaq dámhanasy jergilikti turǵyndarǵa kóje men qurt usyndy.
Qazaq dıasporasynyń ókilderi men «Arlan Jete» teatrynyń ártisteri tanymal qazaqstandyq dızaınerlerdiń ulttyq kıimderin kıip sahnaǵa shyqty. Koreıadaǵy «Nomad» qazaqtar qaýymdastyǵy dırektorynyń orynbasary Balnur Aıtbaeva tatýlyq týy týraly baıan etti.
«Pýsan qalasy men Almaty qalasy arasynda tatýlastyq pen birlestik kelisimi bar. Bıyl osy maqsatta birinshi ret ulttyq Naýryz toıyn uıymdastyrǵan bolatynbyz. Qazaq ónerpazdarynyń Koreıaǵa kelýiniń taǵy bir sebebi – mamyr aıynda Qazaqstannyń Pýsandaǵy bas konsýldyǵynyń ashylǵanyna 1 jyl tolyp otyr», dedi ol.
«Koreıada ózimizdiń qazaqstandyq 30 myńnan astam adam turady. Solardyń múddelerin qorǵaý úshin Seýlge kóptegen jumysker keletin boldy. Bir jyldyń ishinde biz qazaqtarǵa 150 týý týraly kýálik berip, 50 shaqty neke qıdyq. Sonymen qatar Qazaqstannyń 200-ge jýyq azamatyna pasport berdik. Bıyl qyrkúıek aıynda Almaty men Pýsan arasyndaǵy mádenı jáne ekonomıkalyq yntymaqtastyq týraly memorandýmǵa qol qoıylǵanyna 1 jyl tolady. Sondyqtan kúzde Pýsanda almatylyqtardyń taǵy bir konserti ótedi», dedi elimizdiń Pýsan qalasyndaǵy bas konsýly Aıan Qashabaev.
