Parıjde halqymyzdyń uly aqyny Abaı shyǵarmasyna arnalǵan anımasııalyq beınebaıan jaryqqa shyqty. Qazaqstandyq Domınıka Qydyrbaeva bastaǵan 12 anımator 8 aı boıy Abaıdyń «Jelsiz túnde jaryq aı» ánine anımasııalyq beınebaıan túsirdi.
Ánniń mýltıplıkasııalyq nusqasymen jumys istegen Eýropadaǵy bas anımasııa ortalyǵynyń túlekteri úshin, bul – alǵashqy aýqymdy joba.
Anımasııa jobasynyń múshesi Noemı Bont atalǵan fılm týraly oıyn jetkizdi.
– Daıyndyq kezeńi uzaq boldy, biraq óndiristiń ózi, fılm túsirý úderisi, dekor, anımasııalar salý kezinde ýaqyt zyr etip óte shyqty. Sebebi, óte qarqyndy, qyzyqty úderis boldy, – dedi ol.
– Buryn men Abaı týraly mardymdy eshnárse bilgen joqpyn. Alaıda osy jobanyń arqasynda qazaq mádenıetimen jaqyn tanystym. Bul ıdeıany mesenat Larısa Indjýdjıan qoldap, jobaǵa Qazaqstannan kásibı mýzykanttardy shaqyrdy. 1,5 ǵasyrǵa jýyq tarıhy bar án beınebaıanda qazaq tilinde shyrqaldy. Alaıda joba mamandary úshin fransýz tiline avtorlyq aýdarma da jasaldy, – dedi anımasııa jobasynyń múshesi Kloe Benamı.
Joba arqyly uly aqynǵa degen mahabbat ulǵaıyp, shetel turǵyndary ultymyzdyń mádenıetin jaqynnan tanýǵa yqylastary oıanǵan.
Otandyq mýzykant Ǵazıza Ǵabdrahımova joba týraly: «Men ózim qazaqtyń ulttyq ónerin nasıhattaıtyn mýzykant bolǵandyqtan, jobaǵa qatysqanyma óte qýanyshtymyn. Bul qyzyqty jumys. О́ıtkeni Abaıdyń shyǵarmashylyǵy, onyń ánderi, mádenıetimiz basqa elderde, shetelde nasıhattalýda. Qazaqstan elshiliginde ótken tusaýkeserde týyndy jıylǵan jurttyń kóńilinen shyqty», – dedi.
Sonymen qatar beınebaıannyń rýhanı qyr-syryn ashýǵa sheteldik aqyndar da óz úlesin qosqan.
– Mádenıet – bul ulttardy biriktirýshi kópir. Al poezııa – halyqtyń jany, jáne onyń qundylyqtaryn ózge tilde jetkizý erekshe qubylys. Qazaq-fransýz komandasy sátti shyqqan týyndydan keıin, birikken jobalar jasaýdy aldaǵy ýaqytta taǵy da jalǵastyrmaq nıette, – dedi aqyn Taýra Tabatabaı – Verne.
