Tegin donorlyq nasıhattaldy

Ońtústik Koreıa – álemdegi ekonomıkasy damyǵan jıyrma memlekettiń birine aınalyp, «ekonomıkalyq keremetti» júzege asyra bastaǵan el. Jaqynda ǵana jambyldyq bir top dárigerdiń Ońtústik Koreıa astanasy Seýlge sapar shegip, Dúnıejúzilik transfýzıologtardyń 33 kongresine qatysýynyń basty maqsaty  tájirıbe almasyp, biliktilikti arttyrý boldy. Jalpy alǵanda, osy sapar barysynda Qazaqstan men Koreıa 1992 jyldyń qańtar aıynan beri dıplomatııalyq baılanys jasap kele jatqanyn bildik. Osy jyldar ishinde qarym-qatynas barlyq salalarda damyp keledi. Munyń aıǵaǵy retinde 2011 jyl Qazaqstanda «Ońtústik Koreıa jyly» bolyp jarııalanǵanyn aıta ketsek bolady. Biz kongrestiń barlyq jıyndaryna túgel qatysyp, Seýldegi qan ortalyǵynyń jumysymen tanystyq. Bul eldegi qan ortalyǵynyń qyzmeti bizdegiden bir ereksheligi 15 mekemede donorlyq qan daıyndalyp, olardy tekserý tek qana úsh mekemede júredi eken. Bizdiń oblysta bul is tek bir jerde ǵana, atap aıtqanda, oblystyq qan ortalyǵynda daıyndalyp, sol jerde tolyq tekserýden ótkiziledi. Kongrestiń kórme zalynda kóptegen memleketterdiń sońǵy zamanaýı úlgimen jabdyqtalǵan medısınalyq qural-jabdyqtaryn kórip, jumystarymen tanystyq. Qazaqstanda da sońǵy jyldary densaýlyq saqtaý salasyna kóp kóńil bólinip, túrli ozyq úlgili medısınalyq quraldarmen jabdyqtalyp jatqany belgili. Osy kórmeni aralaý barysynda dál qazir ózimiz qoldanyp júrgen medısınalyq quraldar-jabdyqtardyń naryqta áli úlken suranysqa ıe ekenine kózimiz jetti. Iаǵnı, Koreıa paıdalanyp jatqan medısınalyq jabdyqtar men bizdiń eldegi jabdyqtardyń anaý aıtqandaı aıyrmashylyǵy joq. Sondaı-aq, kongreste qan daıyndaý tolyq kólemde tek aqysyz donorlardan jáne olardyń jasy 18-28 aralyǵynda bolýy kerek ekeni basa aıtyldy. Ǵalymdardyń júrgizgen zertteýleri boıynsha qan tapsyrýdyń adam den­saýlyǵyna zııansyz ekeni dáleldengen. Tipti, qan tapsyratyn adamdar qan tapsyrmaıtyn adamdarǵa qaraǵanda ınfarkt, ıshemııalyq aýrýlarmen on ese sırek aýyratyn bolyp shyqqan. Jambyl oblysynda «100 mektep, 100 aýrýhana» memlekettik baǵdarlamasy aıasynda 2010 jyly oblystyq qan ortalyǵy ashyldy. Ol jylyna 15 myń lıtr qan daıyndaýǵa laıyqtalǵan jáne dúnıejúzilik standartqa sáıkes jańa qural-jabdyqtarmen jasaqtalǵan. Iаǵnı, burynǵydaı oblys boıynsha barlyq emdeý mekemelerinde donorlyq qan daıyndaý toqtatyldy. Ońtústik Koreıa saparynan bizdiń dárigerler osy salanyń kóptegen jetistikterin kózimen kórip, úlken tájirıbe jınaqtap qaıtty. Sheteldik áriptesterimizdiń bizdiń elge degen ystyq yqylasyn, joǵary qurmetterin anyq sezindik. Eki eldiń aq halatty jandarynyń arasyndaǵy barys-kelis aldaǵy ýaqytta damı beretini sózsiz. Baqberdi KEZEMBAEV, Jambyl oblystyq qan ortalyǵynyń dırektory.  Jambyl oblysy.