Sýretti túsirgen Erlan OMAR, «EQ»
«Býrabaı» memlekettik ulttyq tabıǵı parki – Prezıdent Is basqarmasynyń vedomstvolyq baǵynysty uıymdarynyń biri. Bul aımaqtyń ınfraqurylymyn damytý barysy týraly Prezıdent Is basqarýshysy Aıbek Dádebaev óziniń telegram arnasynda egjeı-tegjeıli málimet berdi.
– Byltyr kýrorttyq aımaqqa 711 myńnan asa adam keldi. Bul – tek ulttyq parktiń baqylaý-ótkizý beketinen ótkenderdiń sany. Al bıylǵy kórsetkish byltyrǵydan kem túspeıdi dep mejelenip otyr. Árıne, týrızmdi damytyp jatqan óńirge demalýshylardyń kóp kelgeni jaqsy. Degenmen ulttyq park úshin bul birshama júk ekenin de eskergen jón. Sondyqtan «Býrabaı Damý» kásiporny men «Býrabaı» ulttyq parki belsenip jumys isteýi kerek. Bul, ásirese, órt qaýipsizdigi men qoryqty qorǵaýǵa qatysty, – dedi.
Onyń aıtýynsha, órtti der kezinde anyqtap, tez arada aýyzdyqtaýda smart-júıe óz tıimdiligin kórsetti. Aıtalyq, byltyr 21 órt oqıǵasy tirkelip, jalyn sharpyǵan jer kólemi 1,3 gektarmen shekteldi. Iаǵnı tilsiz jaýdyń taralý aýmaǵy 2021 jylmen salystyrǵanda 8,6 ese azaıǵan.
– Bıyl jalǵasyn tabatyn «Smart National Park Burabay» jobasynyń aıasynda 5 ótkizý-baqylaý beketin avtomattandyrý, qorshaǵan ortaǵa monıtorıng jáne saraptama jasaıtyn qosymsha quraldar ornatý, ǵylymı jumystardy kúsheıtý josparlanyp otyr. Sonymen qatar órtti erte anyqtaıtyn qosymsha 3 baqylaý kamerasy qoıylmaq. Osylaısha, baqylaý kameralary bar 17 munara arqyly «Býrabaı» parkiniń ǵana terrıtorııasyn emes, irgeles jatqan qorǵalatyn aýmaqty da baqylap otyrady. Bul degenimiz – 377 166 gektar jer, – dedi A.Dádebaev.
Sonymen qatar ol bıyl jazda týrısterdiń at shaldyryp, aıaq sýytýyna arnalǵan qosymsha 35 beket boı kóteretinin, onyń ishinde 26 beketke ot jaǵatyn oshaq qoıylatynyn jetkizdi. Ústel, sáki, oshaq, órt sóndirý quraldary qoıylǵan osyndaı oryndar Úlken Shabaqty, Kishi Shabaqty kólderiniń jaǵasynda, sondaı-aq «Terrasa park» qonaqúıinen «Aqbýra» kýrortyna deıin sozylyp jatqan velosıped jolynyń boıynda ornalasady. Al ot jaǵýǵa bolmaıtyn, tek tamaqtanatyn, demalatyn oryndar «aıqulaq» músinnen bastap Abylaı han alańyna deıingi velojoldyń boıynda, Kenesary úńgirine jaqyn mańda salynady.
Osy oraıda týrısterge arnalǵan beketterdiń naqty kartasyn «Býrabaı Damý» JShS men «Býrabaı» MUTP saıttarynan, sondaı-aq Ulttyq parktiń mobıldi qosymshasynan kórýge bolatynyn atap ótken jón.
