Avtor óz monografııasynda qazaq mádenıetiniń ıntegratıvti erekshelik máselelerin qarastyrady. Monografııalyq eńbek joǵary oqý oryndarynyń stýdentterine, magıstranttarǵa, doktoranttarǵa, gýmanıtarlyq sala mamandaryna arnalǵan.
Atalǵan is-sharaǵa tanymal ǵalymdar Búrkitbaı Aıaǵan, Tursyn Jurtbaı, Serik Negımov, О́.Ozǵanbaı, K.Qurmanálıev memleket jáne qoǵam qaıratkeri Darhan Myńbaı qatysyp, avtordyń eńbegi jaıynda oı-pikirlerin ortaǵa saldy.
– Tileýǵalı Áshirbekulyn T.Júrgenov akademııasynda oqytýshy bolyp júrgen kezimnen bastap tanımyn. Keıin ǵylymı jetekshim boldy. Tuńǵysh ret estrada salasyna qatysty dıssertasııany sátti qorǵap shyqqan edik. Sol kezden bastap óziniń erekshe bolmysymen, isine degen adaldyǵymen, eńbeksúıgishtigimen barshamyzǵa úlgi boldy. Tileýǵalı aǵany ustazym retinde ǵana emes, jolymdy ashqan meıirban aǵa retinde de qurmetteımin, – dedi Qazaq ulttyq horeografııa akademııasynyń rektory Bıbigúl Núsipjanova.
Tileýǵalı Qyshqashbaı – alty monografııa men bes oqýlyqtyń, 16 oqý quraly jáne 50-ge jýyq ǵylymı maqalanyń ıesi.
– Kitaptyń birinshi taraýy qazaq ónerin zertteýdiń negizgi arnalaryna arnalǵan. Budan keıingi taraýlarda qazaq óneriniń mıftik-dinı úlgisiniń prınsıpteri jáne paradıgmalyq múmkindikteri, ertedegi kóshpeliler óneri sınteziniń erekshelikteri taldandy. Keıingi úsh taraýda orta ǵasyr dáýirindegi qazaq óneriniń ózara baılanysý paradıgmasy, jańa dáýirdegi tól ónerdiń translıasııalyq túıindiligi men ıntegrasııasy, sondaı-aq ulttyq ónerdiń ózara baılanysynyń jańa tıpteri qamtyldy, – deıdi avtor.
Kúnnur BOLATBEK,
L.N.Gýmılev atyndaǵy EUÝ-dyń
2-kýrs stýdenti
