Is-sharaǵa memlekettik jáne quqyq qorǵaý organdarynyń, joǵary oqý oryndarynyń ókilderi, Parlament depýtattary, ǵalymdar, О́zbekstan, Reseı jáne Belarýstiń jetekshi zań ýnıversıtetteriniń sarapshylary qatysty. Jınalǵandardy Joǵarǵy sottyń tóraǵasy Aslambek Merǵalıev, Bas prokýror Berik Asylov, Konstıtýsııalyq sottyń tóraǵasy Elvıra Ázimova, TMD elderi bas prokýrorlarynyń Úılestirý keńesiniń atqarýshy hatshysy Vladımır Zımın, sondaı-aq Astanadaǵy EQYU Baǵdarlamalar keńsesiniń basshysy Frobart Folker qarsy aldy. Konferensııa jetekshi otandyq jáne sheteldik mamandar men praktıkterge pikir jáne tájirıbe almasýǵa, jasandy ıntellekt múmkindikterin tıimdi paıdalaný jóninde usynystar ázirleýge múmkindik berdi.
Bas prokýror Berik Asylov jasandy ıntellekt taqyryby ózekti ekenin, quqyq qoldaný praktıkasyna sıfrlyq tehnologııalardy engizý qylmystyń aldyn alý, quqyq buzýshylyqtardy jedel ashý jáne obektıvti tergeý jónindegi jumystyń tıimdiligin arttyrýǵa yqpal etetinin atap ótti. Spıkerler sıfrlandyrý búginde memlekettik basqarý júıesin jetildirýdiń joǵary suranysqa ıe jáne keleshegi zor baǵytyna aınalǵanyn jetkizdi.
Ǵylymı-tájirıbelik pikirtalastar sheńberinde qylmystardy tergeýde, sot isin júrgizýde, jalpy zań praktıkasynda, aýqymdy derekterdi halyqaralyq-quqyqtyq retteýde sıfrlyq tehnologııalardy (Big Data) qoldaný máseleleri qamtyldy. Sıfrlyq tehnologııalardy engizý qupııa málimetterdi jarııa etý jáne olardy quqyqqa qarsy maqsattarda paıdalaný táýekelderin boldyrmaý úshin adam quqyqtaryn saqtaý jáne derbes derekterdi qorǵaý máselelerine erekshe nazar aýdarylady. Kıberqaýipsizdikti qamtamasyz etý kontekstinde aqparattyq tehnologııalar salasyndaǵy zamanaýı táýekelder men qaýipter, korporatıvtik alaıaqtyqqa qarsy is-qımyl maqsatynda aýqymdy derekterdi (Big Data) paıdalaný múmkindikteri, «Darknet» tehnologııalaryn paıdalana otyryp jasalǵan qylmystardy tergeý erekshelikteri qarastyryldy. Qatysýshylar is-shara sońynda osy baǵyttaǵy yntymaqtastyqty qarqyndy túrde arttyrýǵa kelisti.
