«Jastar» saraıynda uıymdastyrylǵan is-sharada jastar áleýetti jumys berýshilermen áńgimelesip, kásibin qalaı bastaý jáne júrgizý týraly qajetti aqparatpen qanyqty. Sondaı-aq jan-jaqtan jıylǵan kópshilikke jármeńkede shaǵyn nesıeler, jumyspen qamtýǵa járdemdesý sharalary, «Jasyl el» jobasynyń múmkindikteri túsindirildi. Kezdesýge Astana qalasynyń jumyspen qamtý jáne áleýmettik qorǵaý basqarmasynyń basshysy Ilıa Skýb, «Agrarlyq nesıe korporasııasy» AQ fılıalynyń dırektory Áset Kóshkinbaev, qala ákimdiginiń halyqty jumyspen qamtý ortalyǵynyń dırektory Baqytbek Qabjanov, «Stýdenttik qurylys jáne jastar otrıadtarynyń respýblıkalyq qozǵalysy» QQ tóraǵasynyń orynbasary Asylbek Abdýrashıtov qatysty.
Alańda Agrokredıttik korporasııa, Kásipkerler palatasy jáne halyqty jumyspen qamtý ortalyǵy ókilderimen konsýltasııalar uıymdastyryldy. Sondaı-aq kezdesýde «Fortebank» AQ, Oqý-aǵartý mınıstrliginiń «Ulttyq testileý ortalyǵy» RMQK, «Bank SentrKredıt» AQ Astana qalasyndaǵy fılıaly, «Astana Tazalyq» JShS, Astana qalasy boıynsha Memlekettik kirister departamentiniń Baıqońyr aýdany boıynsha Memlekettik kirister basqarmasy, Qarjy mınıstrligi Memlekettik kirister komıteti sekildi 16 jumys berýshi kompanııa boldy.
Is-sharada paıdaly aqparat alǵandardyń biri – 27 jastaǵy Aıdana Sáden. Kásipker kórshi Qytaı men Túrkııadan aıaqkıim jetkizedi. Bıznespen aınalysqanyna úsh jyl bolǵan arý konkýrstyq negizde jeńildikti kredıt beriletinin estip, sol jerde birden ótinish berdi.
«Men óz bıznesimdi keńeıtý úshin memleketten 2,5%-ben 5 mıllıon teńge aldym. Bul – tamasha múmkindik. Bul qarajatty 5 jyl ishinde qaıtaramyn. Bıznes ashýdy josparlap otyrǵan jastarǵa osy múmkindikti paıdalanýdy usynamyn. Shaǵyn nesıe 21 jastan 35 jasqa deıingi jas kásipkerlerge beriledi eken», dedi elordalyq kásipker.
Bir aıta keterligi, Aıdana sekildi memlekettiń jasap jatqan múmkindikterinen beıhabar jastar áli de bar. Tipti keıbireýleri atyn estise de, shartyn bile bermeýi yqtımal. Sondyqtan mundaı jármeńkelerdi jıi ótkizý mańyzdy. Astana qalasynyń jumyspen qamtý ortalyǵynyń is-sharany ótkizýdegi basty maqsaty osy. Iаǵnı memlekettik baǵdarlamalardyń tetigin túsindirip, yntaly jas kásipkerlerge jol ashý. Buǵan qosa NEET sanatyndaǵy azamattardyń qataryn azaıtý.
Arnagúl ÝATQAN,
L.N.Gýmılev atyndaǵy
EUÝ 3-kýrs stýdenti
