Iá, bul kúni О́lgeı kóginde óleń qalyqtap, jyr tógildi, kúı kúmbirlep, án shyrqaldy. «Qalqaman kele jatyr» dep kúni buryn máre-sáre bolysqan el zaldan oryn alyp, kesh boıy aqynǵa qurmet, qoshemet kórsetýmen boldy.
Aqynnyń aıtýynsha, О́skemendegi Oralhan Bókeı atyndaǵy kitaphana Mońǵolııanyń Baıan-О́lgeı aımaǵyndaǵy Aqtan Babıuly atyndaǵy ortalyq kitaphanamen áriptestik yntymaqtastyqta tyǵyz jumys istep kele jatqanyna birneshe jyl bolǵan eken. Byltyr Mońǵolııadaǵy kitaphana qyzmetkerlerimen О́skemende ótken iskerlik kezdesýde birqatar másele aıtylǵan. Atap ótsek, Baıan-О́lgeıdegi qandastarymyz qazaqtyń ádebı kitaptaryna zárý eken. Bul máseleni eskergen O.Bókeı kitaphanasynyń ákimshiligi elimizdegi birqatar kitap baspasyna habarlasyp, ádebı kitaptar kerektigin jetkizgen. Sóıtip, 500-ge jýyq ádebı kitap pen mektep oqýlyǵyn Naýryz meıramyna oraı alystaǵy aǵaıynǵa joldaǵan.
Sol jolǵy kezdesýde Aqtan Babıuly atyndaǵy aımaqtyq ortalyq kitaphana dırektory Altyngúl Dálelqyzy aqyn Qalqaman Sarındi Baıan-О́lgeıge arnaıy shaqyrǵan.
«Sizderdi kórgenime qýanyshtymyn. Eki kúnnen beri kıeli topyraqty basyp, tútinin ıiskep, sýyn iship, dámin tatyp jatyrmyz. О́mirdegi eń sáýleli, baqytty kúnderdiń biri», dep Qalqaman Sarın Baı ólkeniń halqyna óz rızashylyǵyn bildirdi.
Eki saǵatqa josparlanǵan jyr keshi úsh saǵatqa sozyldy. О́lgeılikter óleńge ábden sýsaǵan eken. Uıyp tyńdady. Aımaq basshylary da tóbe kórsetip ketip qalǵan joq. Kesh sońyna deıin tapjylmady. Árıne, mundaı kesh kúnde bola bermesi anyq. Kóńildi keshte óleń oqylyp, aqynnyń sózine jazylǵan ánder ǵana shyrqalyp qoıǵan joq, Qalqaman Sarınge jergilikti jurt kókeıdegi suraqtaryn qoıyp, suhbattasty da. «Kúz ben qyz týraly jaza beresiz» dep ázilge basqandary da boldy. Alaıda:
«Aýyl. Túndi jamylyp ap,
Túgel tylsym kóshke eretin.
...Bizdiń úıdiń shamy biraq,
Bárinen de kesh sónetin»,
dep «Arqattaǵy bizdiń úı» atty óleńin oqyp, tyńdarmandy tebirentti. Shyǵystyń belgili kúıshisi Shalqar Yryshan sahnada Tólegen Mombekovtiń «Saltanat» kúıin oryndap, Qalqaman Sarın kúıge arnaǵan óleńin jáne oqydy. Aqynnyń oqyrmandary da jyrdan shashý shashty. Kesh sońynda Baıan-О́lgeı basshylyǵy men kitaphana ujymy qalamgerge qurmet kórsetip, estelik syılyq tabys etti. Keýdesine «Baıan-О́lgeı aımaǵynyń qurmet medalin» taqty. Shyǵarmashylyq adamy úshin budan asqan qurmet-qoshemet bar ma? Kesh sońynda Qalqaman Sarın de shyǵarmashylyq keshti uıymdastyrǵan qandastarǵa alǵysyn jaýdyrdy.
О́skemen – Baıan-ólgeı
