Munda keshendi medısınalyq-áleýmettik, psıhologııalyq-áleýmettik jáne áleýmettik-pedagogıkalyq jaǵynan ońaltý júzege asady. Atalǵan nysan 1 gektar aýmaqta ornalasqan. Onda 54 qyzmetshi eńbek etedi. Mekemede bir mezgilde 40 múgedek balaǵa qyzmet kórsetiledi.
Ortalyq 2 korpýstan turady, onyń alǵashqysynda árqaısysy 6 múgedek balaǵa arnalyp jabdyqtalǵan 6 jatyn jáne oıyn bólmesi bar. Ekinshi ǵımarat balalardyń em-dom qabyldaýyna arnalǵan. Munda múgedektigi bar balalardyń aıaq, qol, tirek múshelerin emdep, jattyqtyratyn jabdyqtarmen qamtamasyz etilgen zal, shomylý basseıni, monsha, dýsh, logoped, defektolg, montessorı, sensorlyq, sylap-ýqalaý, tuzdy shahta, eńbekke baýlý bólmeleri men akt zaly bar. Eki korpýs arasyn 100 metrlik jabyq dáliz jalǵaıdy.
«Oblys basshylary erekshe kútimdi qajet etetin jasóspirimderge jan-jaqty keshendi ońaltý sharalary qajet ekenine mán berip, zamanaýı standarttardy eskere otyryp, buryn oblys ákiminiń rezıdensııasy bolǵan osy keshendi ońaltý ortalyǵyna tartý etti. О́ńirde múmkindigi shekteýli 600-den asa jasóspirim bar. Olardyń bárin ortalyqtyń qamqorlyǵyna birden alý múmkin emes. Sondyqtan biz 1,5 jas pen 18 jas aralyǵyndaǵy 40 jasóspirimge kezekpen belgilengen merzimge ońaltý sharalaryn jasaımyz», deıdi mekeme dırektory Gúlnaz Qybraeva.
Ońaltý ortalyǵy múgedektigi bar balalardy kúndelikti tasymaldaýǵa qajetti transport taýqymetin tartyp otyr. Qazir munda ortalyqqa keletin balalardy tasymaldaýǵa arnalǵan bir ǵana shaǵyn avtobýs bar. Onymen búkil aýdan aýmaǵyn aralap, múgedek balalardy kúndelikti tasymaldaý múmkin emes. Sondyqtan kezekti kórshiles eldi mekenderdiń ornalasý jaǵdaıyna qaraı túzýge týra keledi.
Búginde Jarkent qalasynyń shyǵys betkeıindegi kúrejoldyń boıyna ornalasqan aýyldardaǵy, qalanyń óz basyndaǵy 40 múgedek jasóspirim em-dom alyp jatyr. Olar keshendegi jatyn bólmesine qımyldaý qabiletine, psıhologııalyq jaǵdaıyna qaraı ornalastyrylady. Olarǵa ortalyqtaǵy arnaıy mamandardan basqa 6 tárbıeshi qyzmet etedi. Balalarǵa 5 ýaqyt tamaq berilip, kúni boıy em sharalary jasalady.
Ortalyq basshysy Gúlnaz Muqataıqyzy «Shirkin, oqıtyn múgedektigi bar balalarǵa osy mekemede bilim alýǵa jaǵdaı jasalsa, tipti jaqsy bolar edi», degen arman-tilegin de aıtyp qaldy. Kóbine qashyqtan bilim alatyn oqýshylardy sabaq kezinde úıine ne mektepke aparyp-alyp kelý tamaqtanýy men em alý kestesiniń buzylýyna áser etetin kórinedi.
Ortalyqta múmkindigi shekteýli jasóspirimderge em sharalaryn jasaıtyn 8 kabınet bar. Olardyń árqaısynda arnaıy mamandar jumys isteıdi. Mysaly, defektolog Juldyz Shúkeıitova aldyna kelgen múgedektigi bar balanyń tanymdyq áreketin qalyptastyryp, sózdik qoryn, oılaý qabiletin arttyrsa, montessorı bólmesindegi psıholog Nurgúl Qııasbekova balanyń erkin oınap, óz betimen qımyl-qareket jasaýyna jol ashady. Logoped Gúlnur Arynova balanyń tilin jetildirip, sóıleý qabiletin ońaltady. Baqyt Kókeev eńbek etýge baýlıdy, jattyqtyrýshy Erdos Balabekov sýda júzdirip, Rústem Týysbaev arnaıy qondyrǵylar arqyly qımyl-tirek múshelerin, aıaq, qol býyndaryn jetildirý jattyǵýlaryn júrgizedi.
Iá, týǵanynan taǵdyrdyń taýqymetin tartyp, ártúrli derttiń tyrnaǵyna ilinip jatatyndar kúnnen-kúnge artyp keledi. О́kinishti. Sondyqtan qoǵamda múmkindigi shekteýli dep atalatyn bul jandarǵa, ásirese balalarǵa jaǵdaı jasaý – mindet. Sol sebepti Prezıdent Qasym-Jomart Toqaevtyń bastamasymen uıymdastyrylǵan «Igi ister marafony» jalpyulttyq jobasy aıasynda ashylǵan mekeme balalardy qýantyp keledi. Endi el ıgiligine qyzmet etip, balalardyń densaýlyǵyn qalypqa keltirýge sep bolyp jatsa, quba-qup.
Jetisý oblysy
