Astanada bas qosady

Elordadaǵy Ortalyq kommýnıkasııalar qyzmetinde Mádenıet mınıstri Arystanbek Muhamedıuly men eli­miz­degi IýNESKO jáne ISESKO isteri jónindegi Ulttyq komıssııanyń bas hat­shysy Ásel О́tegenovanyń qatysýy­men brıfıng ótti. Elimiz IýNESKO uıymyna 1992 jyly mamyrda kirgen bolsa, IýNESKO isteri jónindegi Qazaq­stan Respýblıkasynyń Ult­tyq komıssııasy 1993 jyly Syrt­qy ister mınıstrliginiń janynan qurylǵan. Osy aralyqta elimiz ben IýNESKO arasyndaǵy baılanys óz jemisin berip úlger­di. Basqasyn aıtpaı-aq, tek byl­tyrǵy jyly elimizdiń 2013-2022 jyldar aralyǵyn «Mádenıetter jaqyndastyǵynyń halyqaralyq on jyldyǵy» dep jarııalaý týraly bastamasyn bedeldi uıymnyń qoldap, osy bir ǵana bastamanyń tóńireginde dúnıejúzi boıynsha myńnan astam is-sharalardyń uıymdastyrylýy yntymaqqa negizdelgen baılanystyń nátıje­si ekenin kórsetedi. Sondaı-aq, IýNESKO-nyń búkilálemdik mádenı mura tiziminde Qoja Ahmet Iаsaýı kesenesiniń, Tam­ǵaly petroglıftik tas kesheni men Saryarqanyń, ıaǵnı Soltús­tik Qazaqstannyń dalasy men kól­deriniń bar ekeni, al Qor­ǵaljyn jáne Alakól tabıǵı qo­ryq­tarynyń bıosferalyq re­zervattardyń dúnıejúzilik je­li­sine engizilgeni árbir qazaq­stan­dyq­tyń qaperinde júrse artyq emes. Mine, sol bedeldi uıymǵa múshe elderdiń IýNESKO is­teri jó­nindegi Ulttyq komıs­sııa­larynyń birinshi óńiraralyq keńesi tuńǵysh ret jahandyq formatta Astana qala­synda ót­kizilmek. Shildeniń sońyna qaraı ótetin aýqymdy is-sharaǵa 130-dan astam memleketterden arnaıy ókilder kelip, ALEKSO, OAZHI, TÚRKSOI sııaqty serik­tes halyqaralyq uıymdardyń baqylaýshylary qatyspaq. Bul týraly Mádenıet mınıstri Arys­tan­bek Muhamedıuly brıfıngte málimdedi. «Atalǵan shara Ulttyq komıs­sııalardyń áriptestigin, sondaı-aq, olardyń IýNESKO Hat­shylyǵymen baılanystaryn nyǵaıtý jáne uıymnyń kún tártibindegi problemalaryn keńinen talqylaý maqsatynda ótki­zil­mek. Bul elimizdiń ımıdji úshin óte paıdaly», dedi ol. Mınıstr óz sózinde iri halyqaralyq sharany ótkizýde elimizdiń qarjylyq shyǵyny kóp bolmaıtynyn da basa aıtty. «Atalmysh sha­ra­ǵa qatysatyn Ulttyq ko­­mıs­­sııa jetekshileri Astanaǵa óz qar­jylarynyń esebinen keledi. Biz tek ishki shyǵyndardy óteıtin bolamyz», dedi A.Muhamedıuly. Mádenıet mınıstri Parıj­degi IýNESKO janyndaǵy Qazaq­stannyń turaqty ókili Oljas Súleımenov pen IýNESKO isteri jónindegi Ulttyq komıssııanyń burynǵy tóraǵasy, Astana qala­sy­nyń ákimi Imanǵalı Tasma­ǵam­betovtiń osy jyldar ishinde erekshe eńbek sińirgenderin atap ótti. Al, Qazaqstannyń IýNESKO jáne ISESKO isteri jónindegi Ulttyq komıssııanyń bas hatshysy Ásel О́tegenova keletin de­legattarǵa halqymyzdyń máde­nı nysandary, dástúri, tarıhı baı muralarymen qatar, elimizdiń halyqaralyq bastamalary usynylatynyn jetkizdi. «130-dan astam memlekettiń shara­ǵa qatysýy olardyń el máde­nıeti­ne qyzyǵýshylyq tanytyp otyr­ǵandyǵyn dáleldeıdi. Shara aıasynda eki kórme ótedi. Birinshi kúni biz ulttyq muralardyń kór­mesin, al ekinshi kúni Qazaqstan halqy Assambleıasynyń kórmesin usynamyz. Sonymen birge, qo­naq­tar kóshpeli órkenıet festı­vali­ne qatysady. Sharanyń jahan­dyq formatyn eskere otyryp, EKSPO-2017 halyqaralyq kór­mesin, Halyqaralyq ýnıversıadany, Assambleıa qyzmetin, álemdik jáne dás­túrli dinder kóshbasshy­lary­nyń qu­ryltaıyn, taǵy basqa da elimizdiń barlyq halyqaralyq bastamalaryn nasıhattaımyz»,  degen ol keńestiń saltanatty ashylý rásimi óte joǵary deńgeıde uıym­dastyrylatynyn aıtty. Aıgúl SEIILOVA, «Egemen Qazaqstan».