Máselen, 2021 jyly qylmystyq isti toqtatamyn dep aldaý arqyly 40 mln teńge para alǵan polısııa general-maıory B.Bılıalovqa qatysty tergeý aıaqtaldy. Aıyptaý aktisi prokýratýraǵa jiberilgen. Sondyqtan Qylmystyq-prosestik kodekstiń 201-babyna sáıkes tergeý múddesi úshin ózge aqparat jarııa etýge jatpaıdy.
Sonymen qatar Almaty oblysy boıynsha Sybaılas jemqorlyqqa qarsy qyzmet TJM «Qazseldenqorǵaý» MM basshylaryna qatysty sotqa deıingi tergeýdi aıaqtady. Olar oryndalǵan jumys aktilerine qol qoıǵany jáne jalpy qamqorlyǵy úshin kásipkerlerden jalpy somasy 396 mln teńgege iri jáne asa iri mólsherde para alǵany úshin aıyptalǵan bolatyn. Tergeý sotynyń sanksııasymen kúdiktiler qamaýda otyr. Qazirgi ýaqytta qylmystyq is QPK 300-baby tártibine sáıkes sotqa jiberý týraly máseleni sheshý úshin Almaty oblysynyń prokýratýrasyna berildi.
Paraqorlyq qylmysyna qatysty taǵy bir oqıǵa Abaı oblysynda tirkelgen. 29 mamyrda Abaı oblysy boıynsha Qylmystyq ister jónindegi mamandandyrylǵan aýdanaralyq soty Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Semeı ormany» memlekettik orman tabıǵı rezervaty» RMM basshylyǵyna jáne basqa da tulǵalarǵa qatysty úkim jarııalady.
Memlekettik mekemeniń úsh basshysy uıymdasqan qylmystyq topqa qatysqan jáne kásipkerlerden ár kezderi 700 myńnan 13 mln teńgege deıin para alǵany dáleldengen. Kásipkerler zańsyz syıaqyny laýazymdy tulǵalarǵa rezervat aýmaǵynda sanıtarlyq tazalaý men aǵash kesýge ruqsat bergeni, memlekettik satyp alý jónindegi sharttarǵa kedergisiz qol qoıǵany, sondaı-aq jalpy qamqorlyǵy úshin bergen. Rezervattyń úsh basshysy 10 jylǵa sottaldy, al bes azamat para bergeni úshin kináli dep tanylyp, bir jarym jyldan úsh jarym jylǵa deıingi merzimge bas bostandyǵynan aıyryldy. Budan keıin sottalǵan adamdardyń bári ómir boıyna memlekettik qyzmette, jergilikti ózin-ózi basqarý organdarynda, qarjy uıymdarynda jáne kvazımemlekettik sektorda eńbek ete almaıdy. Úkim zańdy kúshine engen joq.
Sonymen qatar osydan birneshe kún buryn Antıkorrýpsııalyq qyzmet Kentaý qalasynyń eks-ákimine qatysty tergeýdi aıaqtaǵan bolatyn. 2013 jyly ol Premer-mınıstr Keńsesiniń qyzmetkeri bola otyryp, iri jekemenshik kompanııasynyń menshik ıesin jaýapty laýazymdy adamdarda asa iri somada para berýge kóndirgen. Osy úshin qurylys boıynsha tenderde jeńisti qamtamasyz etýge ýáde beredi. Talap etilgen somany alyp, ózine qaldyryp, aqshasynyń bir bóligin Astana qalasynan jańa úı, qymbat avtokólik jáne birneshe júk tehnıkasyn satyp alýǵa jumsaǵan. Onyń áreketteri asa iri kólemde para berýge ıtermeleý jáne alaıaqtyq retinde saralanyp, tergeý sotynyń sanksııasymen ol qamaýda otyr. Qazirgi ýaqytta qylmystyq is materıaldary qabyldanǵan sheshimniń zańdylyǵyn tekserý jáne odan ári sotqa joldaý úshin Astana qalasynyń prokýratýrasyna tapsyryldy.
Aıta keteıik, Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodekstiń 19-baby 1-bóligine sáıkes qylmystyq quqyq buzýshylyq jasady degen kinási dáleldenip, sottyń zańdy úkimi shyqqanǵa deıin árbir adam kinásiz dep esepteledi.
