Al sol ishki jan dúıeni qazynaǵa toltyratyn oryn – kitaphana mártebesi qoǵamda eshqashan óziniń ornyn joǵaltpaq emes. Oıymyzdy tereńdeı tússek búgingi damyǵan zamandaǵy jastar men kitapty baılanystyratyn altyn kópir – kitaphana. Kóne jazbalar men sırek kitaptardyń ǵumyry yqylym zamannan, sonaý baǵzy dáýirlerden bastalady. Sol sekildi kitaphananyń tarıhy óte erteden, kóne ǵasyrlardan bastaý alady. Kitaphana – tek kitap oqıtyn meken emes, onyń óziniń jandy rahat sezimge bóleıtin ishki álemi, tylsym qupııasy bar mártebesi bıik kıeli shańyraq.
Solaı demekshi, bıyl Shymkent qalalyq jasóspirimder kitaphanasyna 45 jyl tolyp otyr. Kitaphana 1978 jyldyń tamyz aıynda oblystyq mádenıet basqarmasy buıryǵymen jáne Mádenıet mınıstrliginiń 1977 jyldyń 23 jeltoqsandaǵy hatynyń negizinde ashylǵan.
Jasóspirimder kitaphanasy 14-16 jas aralyǵyndaǵy jetkinshekterge, jastarǵa, budan bólek pedagogıka salasynda qyzmet atqaratyn ustazdar men tárbıeshilerge, basqa da kózi qaraqty oqyrmandarǵa qyzmet kórsetedi. Sondyqtan ol búgingi tańda megapolıstegi eń iri mádenı-aǵartý, bilim berý, aqparattyq ortalyq bolyp sanalady.
Al ondaǵy kitap qory 174 myń kitapty quraıdy. Onyń qyzmetin jyl saıyn 24 myńnan astam kitapsúıer oqyrman paıdalanady.
«Jasóspirimder kitaphanasy – bul danalyq qazynasy. Osy mekemeniń qyzmetkerleri jas oqyrmandardyń birneshe urpaǵyn tárbıelep ósirdi. Jastardyń rýhanı baılyǵyn molaıtý jolynda úlken jumystar atqaryp jatyr. Kitap dáýir men ǵasyrdyń arasyn jalǵastyrsa, kitaphanashylar kitap pen oqyrman arasyn baılanystyrýshy dáneker», deıdi atalǵan rýhanı ortalyqtyń mamandary.
Ras, elimizdiń erteńi – jas urpaq. Sol óskeleń urpaqtyń túzý aǵashtaı maıyspaı ósýi birinshi kezekte ata-ananyń mindeti bolsa, ekinshiden mektep pen osyndaı rýhanı azyq berýshi ordalardyń jaýapkershiligindegi is. Sol sebepti balalar men jasóspirimder boıynda kitap oqýǵa degen qushtarlyqty oıatý mańyzdy mindet. Mine, osy talap údesinen shyǵý maqsatynda ári óskeleń urpaqtyń rýhanı sýsyndap, ádebı-mádenı oı órisin erteden qalyptastyrý úshin kitaphana qyzmetkerleri «Ájemniń ertegisi» jobasy aıasynda júıeli túrde ártúrli mazmundaǵy is-sharalar ótkizip keledi.
Sonymen birge kitaphanada jastardyń bos ýaqytyn tıimdi uıymdastyrý da mańyzdy. Sondaı-aq kitap oqý úrdisin jańǵyrtý búgingi talaptyń birine aınalyp otyr. Osy maqsatty júzege asyrý baǵytynda kitaphana janynda «Kel syrlasaıyq, qyzdar!», «Jaqsy adammen jarty saǵat», «Aına» syndy múddelester klýby jumys isteıdi. Budan bólek kitaphanada 3 veb saıt oqyrman úshin qyzmet kórsetedi.
ShYMKENT
