Shirigen ónim, sharasyz basshy

Áleýmettik dúkender men iri saýda úılerinde jıi uıym­dastyrylatyn jármeń­kelerde turǵyndarǵa arzan baǵamen sa­tylýǵa tıis ónim nege paıdaǵa aspaı qaldy? Oblystyq aýyl sharýashylyǵy basqarmasynyń Feısbýktegi paraqshasynda «Baıqońyr» ÁKK» AQ basqarma tóraǵasy Samat Ernııazov osy­nyń sebebin túsindirgendeı bolypty.

Onyń aıtýynsha, satylǵan ónimnen jaramsyz qaldyq qa­lýy turaqtandyrý qorynda da, jeke kásipkerde de jıi kez­desetin jaǵdaı eken. Basqar­ma tóraǵasy jaramsyz taýarlardy joıý aldynda aktilep, «Ulttyq saraptaý jáne sertıfıkattaý ortalyǵy» aksonerlik qoǵamynyń synaq hattamasy alynatynyn jazady. Qaýipti tamaq ónimderin joıý jóninde komıssııa qurylyp, Qyzylorda qalalyq sanıtarlyq-epıde­mıo­logııalyq baqylaý basqar­masynyń, Qyzylorda obly­sy boıynsha ekologııa depar­tamentiniń, «Amanat» par­tııa­synyń, Qyzylorda qala­lyq polısııa basqarmasy qyz­metkerleriniń qatysýymen joıý jóninde sheshim qabyldanady eken. Osydan keıin ǵana qoqys polıgonyna jetkiziledi.

2021 jyly 1 197,4 tonna kókónistiń 25 paıyzy, byltyr alynǵan 568,4 tonnanyń 32,7 paıyzy osyndaı jolmen jo­ıylypty. Bıyl 588,1 tonna kartop, 720 tonna pııaz, 106 tonna qyryqqabat, 133 tonna sábiz satyp alynsa, onyń 9,2 pa­ıyzy jaramsyz bolǵan. Basshy jaýabyndaǵy «Bıyl kókónis aldyńǵy jyldarǵa qaraǵanda 3 ese artyq satyp alynǵanmen, jaramsyzdyq kórsetkishi de 3 ese az. Bul – alynǵan ónimniń sapasyn qadaǵalaǵannyń, durys saqtalýyn qamtamasyz etýdiń nátıjesi» degen joldan bıýdjet qarjysyna alynǵan dúnıeniń ysyrap bolǵanyna qınalǵan jannyń keıpi baıqalmaǵan edi.

Apta basynda oblys áki­mi Nurlybek Nálibaevtyń tóraǵalyǵymen ótken májiliste azyq-túlik ysyrabyna jol bergen korporasııanyń jumysyna tıisti baǵa berildi. Aımaq basshysy bul aksıonerlik qoǵam basshysynyń qateligi ekenin, ysyraptyń aldyn alýǵa bolatynyn aıtty. Májiliste «Baıqońyr» ÁKK» AQ basqarma tóraǵasy Samat Ernııazov qyzmetinen bosatyldy.

– Kıe, kepıet degennen qoryqpaıtyn myna qylyq­taryńyzdy aqtap alatyn esh­qandaı sóz joq. Bul áreket­terińizge narazy jurtqa ne aıta­rymyzdy bilmeı otyrmyz. Máseleniń burynnan bar eke­nin bile tura qoımadaǵy ónim­derdi basqa maqsatqa paıdalaný joldaryn izdemeý, 126 tonna ónim shirigenshe qarap otyrý – eldiń jaǵdaıyna ja­ny ashıtyn adamnyń tirligi emes. «Qoımadaǵy shyǵyn jyl­daǵydan 3 ese az boldy» degen jaýaptaryńyz – «Sýǵa ketken tal qarmaıdynyń» keri. Bul sizdiń basshy retinde jumysty tıisti deńgeıde úılestire alma­ǵanyńyzdy kórsetedi. Bazar­daǵy baǵanyń kúnne-kúnge as­pan­dap bara jatqanyn bile tura júzdegen tonna ónimdi jaramsyz qylǵan sizderdiń tirlikterińizge kóz juma qaraı almaımyz. Sizge bizdiń aramyzda oryn joq, – dedi oblys ákimi.

О́nim shirigenshe sharasyz otyrǵan basshy ornynan bo­satylsa, oblystyq aýyl sharýa­shylyǵy jáne jer qatynastary basqarmasynyń basshysy Tal­ǵat Dúısebaevqa qatań sógis jarııalandy. Basqarma basshysyna endi osyndaı qatelik qaıtalansa, ornynan bosatylatyndyǵy eskertildi.

Alda máslıhat depýtattary­nan, Qoǵamdyq keńes ókilderi men janashyr azamattardan jasaqtalǵan komıssııa qurylyp, korporasııa men turaq­tan­dyrý qorynyń jumysy tolyq tekseriletin boldy. Kináli­lerdiń jaýapqa tartylatyny sózsiz. Aldaǵy ýaqytta mundaı jaǵdaı qaıtalanbas úshin tıisti usynystar ázirlenedi.

Sondyqtan komıssııa sala­daǵy kem-ketikti anyqtap qana qoımaı, ony boldyrmaýdyń jolyn usynýy qajet. Qoıma eskirse, jóndeledi. О́nim syımasa, jańa qoıma salynady.

Qyzylorda